جعلی ڈگری تے 33 سال سرکاری نوکری، ایف آئی اے نوں کارروائی دا حکم

وسیم افضل پہلے ایس ایم ای بینک، پھر وزارتِ محنت وچ گریڈ 19 وچ بھرتی ہویا، انٹرا کورٹ اپیل خارج، وصول کیتیاں ساریاں مراعات واپس لئیاں جان: اسلام آباد ہائیکورٹ

اسلام آباد (رضوان قاضی) اسلام آباد ہائیکورٹ دے ڈویژن بنچ نے جعلی ڈگری تے 33 سال تک سرکاری نوکری کرن والے گریڈ 19 دے افسر وسیم افضل وڑائچ دی دائر کیتی گئی انٹرا کورٹ اپیل نوں خارج کردیاں اوہنوں فراڈ تے جعلسازی دا مجرم قرار دے دتا۔

جسٹس اعظم خان تے جسٹس انعام امین منہاس تے مشتمل بینچ ولوں جاری کیتے گئے فیصلے وچ عدالت نے آکھیا کہ بی اے تے ایم بی اے دیاں ڈگریاں دھوکے بازی تے جعلسازی نال حاصل کیتیاں گئیاں سن۔ عدالت نے نوکری دے دوران وصول کیتیاں ساریاں مراعات تے فنڈز واپس کرن دا حکم دیندیاں ہویاں ایف آئی اے (FIA) نوں ہدایت کیتی اے کہ وسیم افضل دے خلاف قانونی کارروائی کیتی جائے۔

اپیل کرن والے نے 1993 وچ جعلی ڈگری دی بنیاد تے ایس ایم ای (SME) بینک وچ نوکری حاصل کیتی سی تے 2009 وچ گولڈن ہینڈ شیک سکیم دے تحت نوکری چھڈی۔ فیر 2011 وچ ایہو جعلی ڈگریاں وکھا کے سیاسی اثر و رسوخ دی بنیاد تے وزارتِ محنت و افرادی قوت وچ گریڈ 19 دی نوکری حاصل کر لئی۔ نوکری دے دوران وی وسیم افضل تے کرپشن تے بددیانتی پاروں محکمانہ انکوائریاں چلدیاں رہیاں۔

2017 وچ اسلام آباد ہائیکورٹ نے وسیم افضل دیاں ڈگریاں جعلی قرار دتیاں سن تے نوکری توں برطرف کرن دی ہدایت کیتی سی، جس تے اوہنے انٹرا کورٹ اپیل دائر کیتی سی، جیہڑی ہن خارج کر دتی گئی اے۔