سیئول: جنوبی کوریا وچ ودھدی پیداواری لاگت تے افرادی قوت دی کمی پاروں بناں عملے دے چلن والیاں کافی شاپس، ریستوران، پھلاں دیاں دکاناں تے دوجے کاروبار تیزی نال مقبول ہو رہے نیں۔

انہاں دکاناں وچ روبوٹس تے سیلف سروس نظام راہیں گاہکاں نوں خدمات دتیاں جاندیاں نیں، بوہتیاں دکاناں 24 گھنٹے کھلیاں رہندیاں نیں جدوں کہ مالکان دے مطابق گھٹ لیبر اخراجات پاروں منافع وچ چلوکھا (نمایاں) اضافہ ہویا اے۔

اسی حوالے نال جنوبی کوریا وچ خودکار روبوٹک کافی شاپ نے انقلاب برپا کر دتا اے، بناں عملے دے کاروبار تیزی نال مقبول ہو رہا اے تے منافع 40 فیصد توں ٹپ گیا اے۔

جنوبی کوریا وچ جدید ٹیکنالوجی نال چلن والیاں بناں عملے کافی شاپس، ریستوران تے دوجیاں خودکار دکاناں دا رجحان تیزی نال ودھ رہا اے۔ ودھدیاں اجرتوں، افرادی قوت دی کمی تے روبوٹس دے بہتر استعمال نے اس کاروباری ماڈل نوں غیر معمولی کامیابی دوائی اے۔

میڈیا رپورٹ دے مطابق 2024 دے دوران جنوبی کوریا وچ بناں عملے دے اسٹورز دی گنتی تقریباً 9 ہزار تیکر اپڑ گئی، جدوں کہ اندازہ اے کہ 2025 وچ انہاں دی گنتی 2020 دے مقابلے وچ تقریباً چار گنا ودھ چکی اے۔

انہاں جدید کافی شاپس وچ روبوٹ خودکار طریقے نال کافی تیار کردا اے جدوں کہ اک ملازم صرف روزانہ تقریباً اک گھنٹے لئی آ کے کافی بینز تے دوجا ضروری سامان بھردا اے تے صفائی دے فرائض انجام دیندا اے۔

اقتصادی ماہرین دا کہنا اے کہ اس ماڈل دی سبھ توں وڈی کامیابی گھٹ آپریشنل اخراجات نیں، جس دی بدولت ایہوجیہیاں کافی شاپس دا منافع 40 فیصد توں بھی ودھ دسا جا رہا اے، جدوں کہ روایتی کافی شاپس دا منافع عام طور تے 10 توں 15 فیصد دے وچکار رہندا اے۔

تجزیہ کاراں دا کہنا اے کہ گھٹ جرائم دی شرح، گاہکاں دا ذمہ دارانہ رویہ تے افرادی قوت دی کمی نے جنوبی کوریا وچ بناں عملے دے کاروباری ماڈل نوں کامیاب بنان وچ اہم کردار ادا کیتا اے۔