امریکا نے یو اے ای نوں برآمدات لئی خصوصی سہولتاں والے ملکاں دی لسٹ وچ شامل کر دتا۔
امریکا نے متحدہ عرب امارات (یو اے ای) نوں برآمدات لئی خصوصی سہولتاں والے ملکاں دی لسٹ وچ شامل کر دتا۔
خبر ایجنسی دے مطابق خصوصی سہولتاں والے ملکاں دی لسٹ وچ شامل ہون نال متحدہ عرب امارات دی جدید امریکی ٹیکنالوجی تے دفاعی سامان تیکر رسائی اسان ہو گئی اے۔
خبرایجنسی دے مطابق متحدہ عرب امارات اے 5 ایکسپورٹ کیٹگری وچ شامل ہون والا پہلا خلیجی تے ترکیے توں بعد دوجا اسلامی ملک اے۔
خلیجی میڈیا دے مطابق ایس نویں درجہ بندی دے تحت متحدہ عرب امارات دی حکومت تے منظور شدہ تجارتی ادارے، مقررہ شراطاں دی پابندی کردیاں ہویاں اسٹریٹجک ٹریڈ آتھرائزیشن (STA) دی رعایت دے تحت متعدد اہل چیزاں انفرادی برآمدی لائسنس توں بغیر حاصل کر سکن گے۔
رپورٹ دے مطابق انہاں چیزاں وچ امریکی محکمہ تجارت دے ضوابط دے تحت آؤن والے کج فوجی آلات، تجارتی سیٹلائٹس تے خلائی جہاز شامل نیں، جنہاں توں تیل تے گیس دی پیداوار، سمندری پانی نوں مٹھا بنان دے منصوبیاں تے سول جوہری توانائی دے شعبیاں وچ فائدہ چکیا جاندا اے۔
امریکی محکمہ تجارت نے کہیا اے کہ انہاں قدماں نال متحدہ عرب امارات دی تجارتی، بنیادی ڈھانچے تے دفاعی ضرورتاں نوں مضبوطی ملے گی، جد کہ مشرقِ وسطیٰ وچ امریکی مفادات دے فروغ وچ وی مدد ملے گی۔
ایہ رعایت ایران دے خلاف جارحیت وچ حمایت دا نتیجہ اے: کاظم غریب آبادی
دوجے پاسے ایران دے نائب وزیر خارجہ کاظم غریب آبادی نے متحدہ عرب امارات لئی امریکی تجارتی پالیسیاں وچ رعایت نوں ایران دے خلاف جارحیت وچ حمایت دا نتیجہ قرار دتا اے۔
اک بیان وچ کاظم غریب آبادی نے متحدہ عرب امارات دے احتساب دا مطالبہ کردیاں ہویاں کہیا کہ امریکی محکمہ تجارت دی برآمدات تے کنٹرول دے ضوابط وچ نرمی ایران دے خلاف عسکری جارحیت دی حمایت دے بدلے وچ دتی گئی اے۔
