قطر دے سابق امیر شیخ حمد بن خلیفہ آل ثانی انتقال کر گئے
پاکستان وچ اج سوگ، صدر تے وزیرِ اعظم دا دکھ دا اظہار: شہباز شریف تے اہم حکومتی اگو (رہنما) تعزیت لئی قطر جان گے
دوحہ، اسلام آباد (مانیٹرنگ ڈیسک)
قطر دے موجودہ امیر دے والد تے سابق امیر شیخ حمد بن خلیفہ آل ثانی 74 ورھیاں دی عمر وچ فوت ہو گئے نیں۔ قطر نے شیخ حمد دے انتقال اُتے 4 دناں دے سوگ دا اعلان کیتا اے، جس دوران پورے قطر وچ قومی جھنڈا جھکیا رہے گا۔ قطر وچ 13 جولائی توں ساریاں وزارتاں تے سرکاری اداریاں وچ چھٹیاں دا اعلان کیتا گیا اے، اوہناں دی نمازِ جنازہ دوحہ دی جامع مسجد امام محمد بن عبدالوہاب وچ پڑھائی گئی۔ پاکستان نے بھی اج شیخ حمد بن خلیفہ آل ثانی دے انتقال اُتے سوگ دا اعلان کیتا اے۔
تفصیلات دے مطابق شیخ حمد نے 1995 توں 2013 تک قطر اُتے راج کیتا تے فیر اقتدار اپنے پتر شیخ تمیم بن حمد آل ثانی دے حوالے کر دتا۔ شیخ حمد بن خلیفہ آل ثانی نوں نویں (جدید) قطر دا معمار منیا جاندا اے۔ صدرِ مملکت آصف علی زرداری، وزیرِ اعظم شہباز شریف تے وزیرِ داخلہ محسن نقوی نے شیخ حمد دے انتقال اُتے ڈونگھے دکھ تے افسوس دا اظہار کیتا اے۔ قطر دے سابق امیر دے انتقال اُتے افسوس لئی وزیرِ اعظم شہباز شریف اج قطر جان گے۔
حکومتی ذرائع دا کہنا اے کہ وزیرِ اعظم قطر دے سابق امیر شیخ حمد دے انتقال اُتے قطری قیادت نال تعزیت کرن گے تے قطر دے امیر شیخ تمیم بن حمد آل ثانی نال ملاقات بھی کرن گے۔ ذرائع نے دسیا اے کہ نائب وزیرِ اعظم اسحاق ڈار تے ہور اہم شخصیتاں بھی اوہناں دے نال ہون گیاں۔ وزیرِ اعظم شہباز شریف نے قطر دی سرکار، شاہی ٹبر تے عوام نال یکجہتی دا اظہار کردیاں ہویاں قطر دے سابق امیر دے انتقال اُتے اج پاکستان وچ یومِ سوگ دا اعلان کیتا اے۔ کابینہ ڈویژن نے 13 جولائی نوں قومی یومِ سوگ دے حوالے نال نوٹیفکیشن جاری کر دتا اے، جس دے مطابق ملک بھر وچ قومی جھنڈا جھکیا رہے گا۔
