جڑواں شہراں سمیت پنجاب وچ مینہ (بارش)، کئی علاقے پانی ہیٹھ آ گئے
پختونخوا وچ تیز مینہہ (بارشاں) دا امکان، لینڈ سلائیڈنگ تے مٹی دے تودے ڈگن دا ڈر، لاہور وچ 190 فیڈر ٹرپ کر گئے، اج وی مینہہ پئے گا، پی ڈی ایم اے دا الرٹ جاری
اسلام آباد، راولپنڈی، پشاور، لاہور (نیوز ایجنسیاں) اسلام آباد تے راولپنڈی وچ گرج چمک تے تیز ہواواں نال مینہہ ورھیا جس توں موسم خوشگوار ہو گیا، خراب موسم پاروں کئی ہوائی جہازاں دیاں پروازاں وی متاثر ہوئیاں۔ محکمہ موسمیات دے مطابق اج وی اسلام آباد، بالائی پنجاب، شمال مشرقی بلوچستان، خیبر پختونخوا تے کشمیر وچ موسلا دھار مینہہ پین دا امکان اے۔ جڑواں شہراں وچ تیز مینہہ پاروں نیویں (نشیبی) علاقے پانی ہیٹھ آ گئے، ایہدے توں وکھ لاہور سمیت پنجاب دے کئی شہراں وچ وی لٹھ مار مینہہ پیا۔ لاہور وچ مینہہ پاروں لیسکو دا بجلی سپلائی دا نظام بری طرح متاثر ہویا، 190 توں ودھ فیڈرز ٹرپ کر گئے تے وکھو وکھ علاقیاں وچ گھنٹیاں تیکر بجلی بند رہی۔ اوادھر گجرات دے نیویں علاقے جل تھل ہو گئے جدکہ حافظ آباد، ڈسکہ تے وزیر آباد وچ وی مینہہ ورھیا۔
خیبر پختونخوا وچ تیز مینہہ پاروں لینڈ سلائیڈنگ تے پہاڑی تودے ڈگن دا خطرہ اے۔ محکمہ موسمیات دے مطابق اس دوران صوبے دے اتلے (بالائی) علاقیاں وچ اچانک ہڑھ (سیلاب) آ سکدا اے، تیز ہواواں تے آسمانی بجلی ڈگن نال کمزور ڈھانچیاں جیویں سولر پینل، بجلی دے کھمبے تے بل بورڈز وغیرہ نوں نقصان پہنچ سکدا اے۔ چترال اپر تے لوئر، دیر، سوات، شانگلہ، ملاکنڈ، بونیر، باجوڑ، کوہستان تے تورغر وچ تیز ہنیری (آندھی) تے گرج چمک نال مینہہ پے سکدا اے۔
پنجاب ڈیزاسٹر مینجمنٹ اتھارٹی (پی ڈی ایم اے) نے آؤندے 24 گھنٹیاں وچ صوبے دے بہتے اضلاع وچ مینہہ دی پیشگوئی کردیاں ہویاں متعلقہ اداریاں نوں ہائی الرٹ رہن دی ہدایت جاری کیتی اے۔ ترجمان پی ڈی ایم اے دے مطابق راولپنڈی، اٹک، مری، چکوال، جہلم، میانوالی، سرگودھا، خوشاب، حافظ آباد، منڈی بہاؤالدین، گجرات، گوجرانوالہ، سیالکوٹ، نارووال، لاہور، شیخوپورہ، ننکانہ صاحب، فیصل آباد، ٹوبہ ٹیک سنگھ، جھنگ، ساہیوال، اوکاڑہ، پاکپتن، قصور، بہاولنگر، بہاولپور، رحیم یار خان، ملتان، خانیوال، وہاڑی، لودھراں، مظفر گڑھ، کوٹ ادو، ڈیرہ غازی خان، راجن پور، لیہ تے بھکر وچ مینہہ دا امکان اے۔
ڈی جی پی ڈی ایم اے دے مطابق وزیر اعلیٰ پنجاب مریم نواز دی ہدایت اُتے پورے صوبے دے کمشنرز، ڈپٹی کمشنرز تے سارے متعلقہ اداریاں نوں الرٹ رہن دی ہدایت جاری کر دتی گئی اے، جدکہ شہریاں نوں احتیاطی تدبیراں اپنان دی صلاح دیندیاں ہویاں آکھیا گیا اے کہ بجلی دے کھمبیاں، لٹکدیاں تاراں، کچے مکاناں تے بوسیدہ عمارتاں توں دور رہن تے کسی بھی ہنگامی حالت وچ پی ڈی ایم اے دی ہیلپ لائن 1129 اُتے رابطہ کرن۔
