پولیس دے بہادر جواناں دا خُون رائیگاں نہیں جائے گا، ایف سی کمانڈرز
کمانڈرز دی شہدا دیاں قبراں اُتے حاضری، پھلاں دیاں چادراں چڑھائیاں، فاتحہ خوانی کیتی
اسلام آباد (دنیا رپورٹ) زیارت وچ شہدا دے لواحقین نال ایف سی کمانڈرز دی ملاقات تے ایس عزم دا اظہار کیتا کہ پولیس دے بہادر جواناں دا خُون رائیگاں نہیں جائے گا۔ پاکستان دیاں سکیورٹی فورسز دے مکمل متحد ہوݨ دا ثبوت دیندے ہویاں فرنٹیئر کور (ایف سی) بلوچستان (نارتھ) دے کمانڈرز نے شہدا دیاں قبراں اُتے حاضری دتی، پھلاں دیاں چادراں چڑھائیاں، فاتحہ خوانی کیتی تے لواحقین نال دلی تعزیت دا اظہار کیتا۔
ایف سی قیادت دا ایہ قدم اداریاں وچالے گہرے تے مضبوط تعلق دا عکاس اے۔ ریاست دے قانون نافذ کرن والے ادارے تے نیم فوجی دستے الگ تھلگ رہ کے نہیں لڑدے بلکہ غم دی ایس گھڑی وچ اک دوجے دے شریکِ سفر نیں تے دہشت گردی دے خلاف رل کے نبرد آزما نیں۔
ملاقاتاں دے موقعے اُتے موجود اک اعلیٰ افسر نے گفتگو کردیاں آکھیا کہ ساڈے پولیس دے بھائیاں دا خُون اساں سبھ اُتے اک قرض اے۔ اسیں ایس دکھ نوں اک ہی خاندان وانگوں محسوس کردے آں تے دہشت گردی دے خلاف اک ہی محاذ اُتے متحد کھڑے آں۔ ایف سی حکام نے سوگوار خانداناں نوں یقین دہانی کروائی کہ اوہناں دے پیاریاں دیاں قُربانیاں نوں نہ کدی بھلایا جائے گا تے نہ ہی اوہناں دا خُون رائیگاں جاݨ دتا جائے گا۔
بلوچستان دے علاقے زیارت وچ دہشت گردی دی حالیہ بزدلانہ کارروائی وچ پولیس دے 27 اہلکاراں نے بھارتی آلہ کار فتنہ الہند دے دہشت گرداں دا جوانمردی نال مقابلہ کردیاں جامِ شہادت نوش کیتا۔ ایہناں وچوں 18 اہلکاراں نوں دہشت گرداں نے یرغمال بنا لیا سی۔ ایہناں بہادر جواناں نے ہتھیار سٹن یا ریاست دی سلامتی اُتے سمجھوتہ کرن دے بجائے اپنی غیرت تے وقار نوں مقدم رکھیا تے جامِ شہادت نوش کر کے پیشہ ورانہ وفاداری تے شجاعت دی اعلیٰ ترین مثال قائم کیتی۔
