پاکستان کشیدگی گھٹ کرن لئی سرگرم: اسحاق ڈار دا ایران تے سعودیہ نال رابطہ
اسلام آباد، تہران (مانیٹرنگ ڈیسک، نیوز ایجنسیاں) نائب وزیراعظم تے وزیر خارجہ سینیٹر محمد اسحاق ڈار نے ایران دے وزیر خارجہ سید عباس عراقچی نال ٹیلی فون اُتے رابطہ کر کے مشرقِ وسطیٰ تے خطے دی تیزی نال بدلدی صورتحال اُتے گل بات کیتی تے دوہاں دھریاں (فریقین) اُتے زور دتا کہ اوہ کشیدگی گھٹ کرن، صبر تے ضبط دا راہ اپناؤن۔
وزارت خارجہ دے مطابق اسحاق ڈار نے ایس گل اُتے زور دتا کہ جون 2026 دی اسلام آباد مفاہمتی یادداشت (ایم او یو) دے مطابق رولیاں (تنازعات) دے حل، پائیدار امن تے خطے وچ استحکام لئی مذاکرات تے سفارت کاری ای کلا قابلِ عمل راہ نیں۔ اوہناں نے خطے وچ امن تے استحکام نوں ودھاؤن لئی پاکستان ولوں اپنا تعمیری کردار جاری رکھن دے عزم نوں وی دہرایا۔
وزارت خارجہ دے ترجمان دے مطابق نائب وزیراعظم اسحاق ڈار نال پاکستان وچ سعودی عرب دے سفیر نواف بن سعید احمد المالکی نے بھی ملاقات کیتی، جس وچ علاقائی صورتحال، امن و استحکام تے کشیدگی مکاؤن لئی سفارتی کوششاں اُتے گل بات کیتی گئی۔ دوہاں دھریاں نے مکالمے تے سفارت کاری نوں ودھاؤن لئی سانجھیوں کوششاں نوں ہور پکا کرن تے پاکستان تے سعودی عرب دے برادرانہ تعلقات نوں ہور ڈونگھا (گہرا) تے مضبوط بناؤن دے عزم نوں دہرایا۔
ایسے دوران اسحاق ڈار نال برطانیہ دے رکن ایوانِ بالا لارڈ عامر سرفراز نے وی ملاقات کیتی۔ ایس موقعے اُتے پاکستان تے برطانیہ دے دوطرفہ تعلقات، برطانیہ وچ رہن والے پاکستانی بھائی چارے (کمیونٹی) نوں پیش مسائل تے برطانیہ دی بدلدی سیاسی صورتحال اُتے گل بات کیتی گئی۔ اسحاق ڈار نے آکھیا کہ پردیس وچ رہن والے پاکستانی، خاص طور تے منے پرمنے پارلیمنٹرینز، دوہاں ملکاں دے وچکار عوامی رابطیاں، تجارت تے سرمایہ کاری نوں ودھاؤن وچ اہم کردار ادا کر رہے نیں تے اگوں وی اپنا تعمیری کردار جاری رکھن گے۔
دوجے پاسے پاکستان نے امریکا تے ایران دے وچکار حالیہ واقعیاں پاروں علاقائی کشیدگی وچ ہور وادھے اُتے ڈونگھی تشویش دا اظہار کیتا اے۔ دفتر خارجہ ولوں جاری بیان وچ آکھیا گیا اے کہ پاکستان خطے دے سارے برادر ملکاں دی خودمختاری تے علاقائی سالمیت دی پوری حمایت دا اعادہ کردا اے۔
پاکستان نے ساریاں دھریاں اُتے زور دتا کہ اوہ صبر دا مظاہرہ کرن، کشیدگی نوں فوراً گھٹ کرن لئی قدم چکن تے اسلام آباد مفاہمتی یادداشت دے تحت کیتے گئے اپنے وعدیاں نوں پورا کرن۔ بیان وچ آکھیا گیا کہ پاکستان مذاکرات تے سفارت کاری راہیں خطے وچ پائیدار امن تے استحکام پاؤن لئی ہر ممکن تعاون دین دے عزم اُتے قائم اے۔
