پاکستان تے سعودیہ دا توانائی تے اقتصادی تعاون ودھاؤن اُتے اتفاق
اورنگزیب تے اویس لغاری دی سعودی وزیر خزانہ نال ملاقات، دوطرفہ تعلقات اُتے گل بات
اسلام آباد (مانیٹرنگ ڈیسک، آن لائن) وفاقی وزیر خزانہ سینیٹر محمد اورنگزیب تے وفاقی وزیر توانائی سردار اویس احمد خان لغاری نے سعودی وزیر خزانہ محمد بن عبداللہ الجدعان نال ملاقات کیتی جس وچ پاکستان تے سعودی عرب دے وچکار اقتصادی شراکت داری تے توانائی دے شعبے وچ تعاون نوں ہور ودھاؤن (وسعت دین) اُتے اتفاق کیتا گیا۔
ملاقات وچ دوہاں برادر ملکاں دے وچکار باہمی تعاون نوں ودھاؤن، سرمایہ کاری دے موقعیاں تے وکھو وکھ شعبیاں وچ پیش رفت نوں ہور اگے ودھاؤن لئی نیڑے دے رابطے تے باقاعدہ صلاح مشورہ جاری رکھن دے عزم نوں دہرایا گیا۔ ملاقات وچ ایس گل اُتے وی اتفاق کیتا گیا کہ پاکستان تے سعودی عرب اپنے پرانے برادرانہ تعلقات نوں اقتصادی تے تجارتی شراکت داری وچ ہور بدلن لئی سانجھیاں کوششاں جاری رکھن گے۔ دوہاں ملکاں نے وکھو وکھ شعبیاں وچ باقاعدہ صلاح مشورے تے تعاون ودھاؤن راہیں دوطرفہ تعلقات نوں ہور مضبوط بناؤن دے عزم نوں دہرایا
