او آئی سی عورتاں (خواتین) کانفرنس: پلان آف ایکشن اُتے عملدرآمد دا جائزہ
اسلام آباد (نیوز ایجنسیاں، خصوصی رپورٹر) اسلامی تعاون تنظیم (او آئی سی) دی نویں عورتاں (خواتین) وزارتی کانفرنس اسلام آباد وچ تکنیکی اجلاساں نال شروع ہو گئی۔
دو دناں دی ایس کانفرنس وچ 57 رکن ملکاں دے وزراء، اعلیٰ حکام تے نمائندیاں سمیت تقریباً 190 مندوبین شریک نیں۔ پاکستان دی میزبانی وچ وزارتِ انسانی حقوق دے انتظام ہیٹھ او آئی سی عورتاں وزارتی کانفرنس دے پہلے دن تکنیکی اجلاس ہوئے، جدکہ او آئی سی رکن ملکاں دے وزراء، اعلیٰ حکام تے بین الاقوامی اداریاں دے نمائندیاں دے وچکار اہم دوطرفہ ملاقاتاں دا سلسلہ وی جاری رہیا۔ وزارتِ انسانی حقوق ولوں جاری بیان دے مطابق تکنیکی اجلاساں دے دوران کانفرنس دے ایجنڈے دی منظوری دتی گئی تے ‘او آئی سی پلان آف ایکشن برائے خواتین’ اُتے عملدرآمد دا جائزہ لیا گیا۔
اجلاس وچ اسلامی دنیا وچ عورتاں نوں پیش چیلنجاں، اوہناں دی سماجی، معاشی تے سیاسی خودمختاری، تعلیم، صحت، معاشی موقعیاں، مالی شمولیت، فیصلہ سازی وچ اثر دار شرکت، ٹیکنالوجی تے ڈیجیٹل شعبیاں وچ عورتاں دی نمائندگی سمیت وکھو وکھ معاملیاں اُتے تفصیلی غور کیتا گیا۔ وزارتی کانفرنس دی چیئر ولوں پچھلی کانفرنس توں بعد عورتاں نوں بااختیار بناؤن لئی او آئی سی دے تحت کیتے گئے کماں تے ہون والی پیش رفت اُتے شرکاء نوں بریفنگ دتی گئی، جدکہ عورتاں دی ترقی بابت وکھ وکھ اداریاں دیاں رپورٹاں وی پیش کیتیاں گئیاں۔ او آئی سی عورتاں کانفرنس دا وزارتی اجلاس اج وزیراعظم دی صدارت ہیٹھ ہووے گا، جس وچ کانفرنس دی چیئرمین شپ باضابطہ طور تے مصر توں پاکستان نوں دتی جائے گی۔
کانفرنس دے آخر وچ ‘اسلام آباد اعلامیہ’ تے عورتاں دی ترقی تے اوہناں نوں بااختیار بناؤن لئی کئی اہم قرارداداں دی منظوری متوقع اے۔ کانفرنس دے موقعے اُتے وفاقی وزیر برائے قانون و انصاف و انسانی حقوق سینیٹر اعظم نذیر تارڑ نے ایران، ترکیہ، سعودی عرب، مصر، بوسنیا و ہرزیگووینا، شام، صومالیہ تے یمن دے وزراء و اعلیٰ حکام توں علاوہ ‘ویمن ڈویلپمنٹ آرگنائزیشن’ تے ‘او آئی سی لیبر سینٹر’ دے نمائندیاں نال دوطرفہ ملاقاتاں کیتیاں۔ انہاں ملاقاتاں وچ عورتاں دے حقوق، ٹبر (خاندانی) نظام دی مضبوطی، سماجی تحفظ، عورتاں دی معاشی و سیاسی خودمختاری، ادارہ جاتی تعاون، تجربیاں دے تبادلے تے او آئی سی دے پلیٹ فارم راہیں سانجھے اقدامات نوں ودھاؤن اُتے تفصیلی گل بات ہوئی۔
ترکیہ نال ٹبر، سماجی خزمتاں (خدمات) تے سماجی تحفظ دے شعبیاں وچ تعاون ودھاؤن لئی ہک مفاہمتی یادداشت (ایم او یو) اُتے دستخط وی کیتے گئے۔ وکھ وکھ ملکاں دے وفود نے او آئی سی وزارتی کانفرنس برائے خواتین دی اگلی دو سالاں دی چیئرمین شپ سنبھالن اُتے پاکستان دے کردار اُتے بھروسے دا اظہار کردیاں عورتاں نوں بااختیار بناؤن، خاندانی فلاح، سماجی تحفظ تے انسانی حقوق نوں ودھاؤن لئی پاکستان نال نیڑے دا تعاون جاری رکھن دے عزم نوں دہرایا۔ وفاقی وزیر قانون اعظم نذیر تارڑ نے آذربائیجان دے او آئی سی لیبر سینٹر دی ایڈمنسٹریٹو ڈویژن دی سربراہ جلیلہ اللہ وردیوفا نال ملاقات کیتی تے بعد وچ پریس کانفرنس وچ آکھیا کہ عورتاں نوں بااختیار بنانا پاکستان دی سب توں پہلی ترجیح اے۔
اوہناں آکھیا کہ پاکستانی عورتاں وکھو وکھ شعبیاں وچ اگلا (نمایاں) کردار ادا کر رہیاں نیں۔ وفاقی وزیر انسانی حقوق اعظم نذیر تارڑ نال ترکیہ دی وزیر برائے خاندانی و سماجی خدمات ماہینور اوزدمیر گوکتاش نے وی ملاقات کیتی، جس وچ عورتاں دے حقوق، خاندانی نظام دی مضبوطی تے سماجی تحفظ نوں ودھاؤن اُتے تفصیلی گل بات ہوئی تے پاکستان تے ترکیہ وچکار ٹبر، سماجی خزمتاں تے سماجی تحفظ دے شعبے وچ تعاون بڑھان لئی مفاہمتی یادداشت اُتے دستخط کیتے گئے۔
ادھر شمالی قبرص ترک جمہوریہ دے وزیر محنت و سماجی تحفظ اوغوزہان حاصب اوغلو نے میڈیا نال گل بات وچ مسئلہ قبرص اُتے اپنے ملک دے موقف نوں دہرایا تے ترک قبرصی عوام دی خودمختار برابری تے مساوی بین الاقوامی حیثیت نوں منن دا مطالبہ کیتا۔ اسلامی تعاون تنظیم دے نویں وزارتی اجلاس دے موقعے اُتے کیتی گئی ثقافتی شام تے رات دے کھانے (عشائیے) توں خطاب کردیاں نائب وزیراعظم اسحاق ڈار نے آکھیا کہ او آئی سی عورتاں دی ترقی تے اوہناں نوں بااختیار بناؤن لئی پہلے ہی ہک پکی بنیاد رکھ چکی اے، ہن ساڈی ذمہ داری اے کہ اسیں اپنے وعدیاں تے عزم نوں عملی پیش رفت وچ بدلیئے۔ ساڈا یقین اے کہ عورتاں نوں بااختیار بنانا کسے بھی قوم ولوں کیتی جانے والی عقلمندانہ سرمایہ کاری اے۔ جدوں اسیں ہک عورت اُتے سرمایہ کاری کردے آں تے اصل وچ اسیں آؤن والیاں نسلاں اُتے سرمایہ کاری کر رہے ہوندے آں۔
