بلوچستان: آپریشن شعبان وچ ہور 3 دہشت گرد مارے گئے
راولپنڈی: پاک فوج، ایف سی بلوچستان تے پولیس دے سانجھے آپریشن وچ ہور 3 دہشت گرد مارے گئے۔
سیکیورٹی ذرائع دے مطابق بلوچستان وچ آپریشن شعبان دے دوران فورسز دیاں فتنہ الخوارج دے خلاف علاقے وچ تگڑیاں کاروائیاں جاری نیں، فورسز ولوں خوارج نوں ہوائی تے زمینی کاروائیاں راہیں نشانہ بنایا جا رہیا اے۔
سیکیورٹی ذرائع دا کہنا اے کہ فورسز دیاں کاروائیاں پاروں خوارج اپنیاں لکن گاہواں چھڈ کے بھجن تے مجبور ہو گئے نیں۔ خوارج دے ٹھکانیاں توں بھاری مقدار وچ اسلحہ، گولہ بارود تے دوجا سامان برآمد کر لیا گیا اے۔
ذرائع دے مطابق فورسز دی کاروائی وچ ہور 3 دہشت گرداں دے مارے جان دی پکی اطلاع اے، جد کہ آپریشن شعبان وچ ہلاک ہون والے دہشت گرداں دی کُل گنتی 79 ہو گئی اے۔ 5 جولائی توں ہن تیکر آپریشن شعبان تے دوجے آپریشنز وچ کُل ملا کے 117 خوارج ہلاک ہو چکے نیں۔
سیکیورٹی ذرائع دا کہنا اے کہ آخری دہشت گرد دے خاتمے تیکر بلوچستان وچ آپریشن شعبان جاری رہے گا۔
