“لانگ مارچ دے دوران ناخوشگوار واقعے دی ذمہ دار ایکشن کمیٹی ہووے گی: آزاد کشمیر حکومت”
دھرنے پاروں پونچھ ڈویژن وچ خوراک تے دوائیاں دی ترسیل شدید متاثر، راہ کھلواؤن تے فائرنگ کیتی گئی؛ الیکشن شیڈول کے مطابق ہون گے، قانون دی حکمرانی تے عوامی مفاد دا تحفظ یقینی بناواں گے: ترجمان دی پریس کانفرنس
اسلام آباد (مانیٹرنگ ڈیسک)
آزاد جموں و کشمیر حکومت دے ترجمان نے آکھیا اے کہ کالعدم ایکشن کمیٹی نے 15 جولائی دے لانگ مارچ وچ طلبہ و طالبات نوں شرکت دی اپیل کیتی اے، کسے بھی ناخوشگوار واقعے دی ساری ذمہ داری کالعدم عوامی ایکشن کمیٹی تے ہووے گی۔ ایہہ گل اوہناں نے آزاد جموں و کشمیر حکومت تے پولیس دے ترجماناں نال مل کے اک پریس کانفرنس دے دوران کہی۔
ترجمان دا کہنا سی کہ حکومتِ آزاد کشمیر تے حکومتِ پاکستان نے ہمیشہ مذاکرات، صلح صفائی تے عوامی مسائل دے حل نوں پہل دتی اے۔ 4 اکتوبر 2025ء دے معاہدے دے تحت کالعدم عوامی ایکشن کمیٹی دے 38 مطالبات وڈے عوامی مفاد وچ منظور کیتے گئے سن، پر کمیٹی بنیادی حقوق دے مطالبات توں ہٹ کے ریاست مخالف مقاصد ول ٹر پئی اے۔
اوہناں آکھیا کہ 36 دناں توں جاری دھرنے پاروں پونچھ ڈویژن وچ خوراک، دوائیاں تے ضروری چیزاں دی سپلائی شدید متاثر ہوئی اے۔ وڈیاں سڑکاں تے رابطہ سڑکاں تے رکاوٹاں کھڑیاں کر کے عام شہریاں دی آؤن جان نوں پوری طرحاں روک دتا گیا اے، جیہدے نال کئی علاقیاں وچ کھان پین دی قحطالی تے ضروری اشیاء دی تھوڑ (کمی) پیدا ہو گئی اے۔ حکومت دی آئینی تے اخلاقی ذمہ داری اے کہ بند راستے کھلوائے۔ پر بند سڑکاں کھلواؤن دی ہر کوشش دے دوران کالعدم کمیٹی ولوں مزاحمت تے فائرنگ دا سامنا کرنا پیا۔
شجاع آباد وچ راستہ بحال کرن والی ٹیم تے نال لگدے علاقیاں تے جنگلاں توں شدید فائرنگ کیتی گئی جیہدے نال قانون نافذ کرن والے اداریاں دے اہلکار زخمی ہوئے۔ ارجہ جنڈالہ وچ بند راستہ کھلواؤن دے دوران ڈوزر تے فائرنگ کر کے آپریٹر نوں زخمی کیتا گیا، تے زخمی آپریٹر نوں ہسپتال منتقل کردے ویلے سکیورٹی فورسز تے وی گولیاں چلائیاں گئیاں۔ کھان پین دا سامان لے جان والے ٹرکاں تے حملے، لٹ مار تے ڈیزل کڈھن دے واقعات کسے پرامن احتجاج دی نشانی نہیں ہن۔
ترجمان نے ہور آکھیا کہ عورتاں تے بالاں (بچیاں) نوں قانون نافذ کرن والے اداریاں دے سامنے انسانی ڈھال لئی ورتن دیاں خبراں ملیاں نیں، تے اوہناں نوں مرضی دے خلاف دھرنے وچ رکھیا جا رہا اے۔ عورتاں تے بچیاں دے ہتھاں وچ قرآنِ مجید تے چٹے (سفید) جھنڈے دے کے اگے لے آؤن دی منصوبہ بندی مذمت جوگ اے۔ قرآنِ مجید نوں کسے وی لڑائی یا محاذ آرائی وچ ورتنا مذہبی تقدس تے اسلامی تعلیمات دے خلاف اے۔
15 جولائی دے لانگ مارچ وچ سکولی بالاں نوں یونیفارم وچ مظفرآباد ول مارچ کروا کے فرنٹ لائن تے کھڑا کرن دی پلاننگ کیتی گئی اے۔ کسے وی ناخوشگوار واقعے دی صورت وچ ساری ذمہ داری کالعدم عوامی ایکشن کمیٹی تے ہووے گی۔ قانون دی عملداری یقینی بنانا تے معصوم شہریاں نوں سکون دینا حکومت دی آئینی ذمہ داری اے۔ عام الیکشن اپنے مقررہ شیڈول دے مطابق ہی ہون گے، حکومت تے ریاستی ادارے ہر قیمت تے امن، قانون دی حکمرانی تے عوامی مفاد دا تحفظ یقینی بناواں گے۔
