“مون سون دا نواں سپیل شروع، لاہور تے ہور شہراں وچ مینہ (بارش)”
مون سون دا نواں سسٹم ملک وچ داخل، لاہور تے ہور شہراں وچ لٹھ مار مینہ (موسلا دھار بارش)، لیسکو دے 190 توں ودھ فیڈرز ٹرپ، کئی علاقے ہنھیرے وچ ڈوبے
اسلام آباد، لاہور، پشاور (نیوز ایجنسیاں)
مون سون دا نواں سسٹم ملک وچ وڑدیاں ہی وکھو وکھ شہراں وچ لٹھ مار مینہ پین دا سلسلہ شروع ہو گیا اے، جیہدے نال گرمی دا زور کافی ٹٹ گیا اے۔
اسلام آباد، راولپنڈی تے گجرات وچ تیز مینہ پاروں نیویں (نشیبی) علاقے جل تھل ہو گئے تے خراب موسم دی وجہ توں کئی ہوائی جہازاں دیاں پروازاں وی متاثر ہوئیاں۔ لاہور، حافظ آباد، ڈسکہ تے وزیر آباد سمیت پنجاب دے کئی شہراں وچ مینہ پیا جیہدے نال موسم خوشگوار ہو گیا۔ لاہور وچ سویر توں لے کے دوپہر تیکر وقفے وقفے نال پین والے مینہ پاروں لیسکو دا بجلی سپلائی کرن دا نظام بری طرحاں تباہ ہو گیا، 190 توں ودھ فیڈرز ٹرپ کر گئے تے وکھو وکھ علاقیاں وچ گھنٹیاں تیکر بجلی بند رہی۔ مینہ دے دوران بجلی دے نظام وچ خرابیاں پیدا ہون، فیڈرز بند ہون تے ٹرانسفارمر سڑن پاروں صارفین نوں شدید دکت دا سامنا کرنا پیا۔
پی ڈی ایم اے (PDMA) دے مطابق اگلے 24 گھنٹیاں وچ لاہور سمیت پنجاب دے بہتے (زیادہ تر) ضلعیاں وچ ہور مینہ پین دی امید اے۔ صوبے دے سارے کمشنراں تے ڈپٹی کمشنراں نوں ہنگامی صورتحال نال نبڑن لئی الرٹ جاری کر دتا گیا اے۔ پچھلے 24 گھنٹیاں دے دوران سب توں زیادہ 51 ملی میٹر مینہ نارووال وچ پیا۔ راولپنڈی وچ 36، گجرات وچ 28، سیالکوٹ وچ 24، مری تے اٹک وچ 19، 19، چکوال وچ 4، لاہور وچ 3 تے منڈی بہاؤالدین وچ 2 ملی میٹر مینہ ریکارڈ کیتا گیا۔
دوجے پاسے نیشنل ڈیزاسٹر مینجمنٹ اتھارٹی (NDMA) نے چتاونی (خبردار) کیتی اے کہ مون سون دیاں بارشاں پاروں اتلے (شمالی) علاقیاں وچ مٹی تِلکن (لینڈ سلائیڈنگ) تے گلگت بلتستان، خیبرپختونخوا نالے آزاد کشمیر دے پہاڑی علاقیاں وچ ہڑھ (سیلاب) دا خطرہ اے۔
