آزاد کشمیر الیکشن وچ ضابطہ اخلاق تے سختی نال عملدرآمد کروان دا حکم
مظفر آباد (14 جولائی 2026): چیف الیکشن کمشنر کشمیر جسٹس ریٹائرڈ غلام مصطفیٰ مغل نے 27 جولائی نوں ہون والے آزاد کشمیر الیکشن وچ ضابطہ اخلاق تے سختی نال عملدرآمد کروان دا حکم دے دتا۔
چیف الیکشن کمشنر کشمیر دی صدارت ہیٹھ انتخابی انتظامات لئی اعلیٰ پدھر دا اجلاس ہویا، جس وچ ریٹرننگ افسراں تے ڈپٹی کمشنراں نوں ضابطہ اخلاق تے پکا عملدرآمد کروان تے خلاف ورزی کرن والیاں دے خلاف فوری کارروائی کر کے رپورٹ گھلن (بھیجن) دی ہدایت کیتی گئی۔
اعلیٰ پدھر دے اجلاس وچ ممبران الیکشن کمیشن، سیکرٹری الیکشن کمیشن سمیت کمشنر تے ڈپٹی کمشنراں نے شرکت کیتی، اجلاس وچ پولنگ اسٹیشناں تے امن و امان برقرار رکھن لئی سکیورٹی دے انتہائی سخت انتظامات دا فیصلہ کیتا گیا اے۔
الیکشن کمیشن دے مطابق ووٹرز نوں پرامن ماحول وچ اپنا حقِ رائے دہی استعمال کرن لئی ہر ممکن سہولتاں دتیاں جان گئیاں۔
اجلاس وچ پولنگ مٹیریل، بیلٹ باکسز تے انتخابی عملے دی ویلے سر (بروقت) تے محفوظ ترسیل لئی موومنٹ اسکیم نوں حتمی شکل دین دی ہدایت کیتی گئی، تے انتخابی نتائج دی ویلے سر وصولی تے الیکشن کمیشن کنٹرول روم تیکر تیز ترین ترسیل لئی وڈے انتظامات دا فیصلہ کیتا گیا۔
جسٹس ریٹائرڈ غلام مصطفیٰ مغل نے دسیا کہ الیکشن کمیشن آزاد، منصفانہ، شفاف تے غیر جانبدار انتخابات لئی سارے ضروری قدم چُک رہا اے۔
