پنجاب اسمبلی: تاریخ وچ پہلی وار پارلیمانی جوڈیشل کمیٹی قائم
سردار اویس کمیٹی دے چیئرمین، علی حیدر گیلانی، شوکت راجہ تے دوجے ممبر ہون گے؛ ڈی پی او قصور دے خلاف تحریکِ استحقاق جمع، اجلاس چھیتی بلائے جان دا امکان
لاہور (سیاسی نمائندہ، دنیا نیوز، آئی این پی): پنجاب اسمبلی دی تریخ وچ پہلی وار پارلیمانی جوڈیشل کمیٹی بنا دتی گئی اے۔ ایس کمیٹی دا قیام پنجاب اسمبلی پریولیجز ایکٹ 1972 دے سیکشن 11 سی دے تحت عمل وچ لیاندا گیا اے۔ سپیکر ملک محمد احمد خان دی ہدایت اُتے بنائی گئی ایس کمیٹی دے چیئرمین اسمبلی ممبر سردار محمد اویس دریشک مقرر کیتے گئے نیں، جدکہ کمیٹی دے دوجے ممبران وچ سید علی حیدر گیلانی، شوکت راجہ، نورالامین وٹو، چودھری افتخار حسین، امجد علی جاوید، ذوالفقار شاہ، راحیلہ خادم حسین تے احمر رشید بھٹی شامل نیں۔ سپیکر دے مشیر اسامہ خاور گھمن کمیٹی دی کارروائی وچ مدد دین گے۔
ایہ جوڈیشل کمیٹی اسمبلی دے استحقاق (حقوق) بارے معاملیاں دی سنوائی، پچھ گچھ (تحقیقات) تے سپیکر ولوں گھلے گئے استحقاقی ریفرنسز اُتے کارروائی کرن دا اختیار رکھے گی۔ کمیٹی نوں نوٹس جاری کرن، ثبوت تے دوجے کاغذات منگوان، گواہاں دے بیان ریکارڈ کرن تے متعلقہ بندیاں دا موقف سُنن دا پورا حق ہوئے گا۔ استحقاق دی خلاف ورزی ثابت ہون دی صورت وچ کمیٹی سزا یا جرمانے دی سفارش یا متعلقہ قانونی کارروائی کر سکدی اے۔
ذرائع دا ہور کہنا اے کہ ایم پی اے سید علی حیدر گیلانی ولوں ڈی پی او قصور آفتاب پھلروان دے خلاف جمع کروائی گئی تحریکِ استحقاق اُتے جوڈیشل کمیٹی دا اجلاس چھیتی بلائے جان دا امکان اے۔ اسمبلی ذرائع مطابق موجودہ حکومت دے دور وچ جوڈیشل کمیٹی دا ایہ پہلا اجلاس ہوئے گا۔
