ٹیلی کام ٹاور وی لوڈشیڈنگ توں متاثر، بجلی جاندے ہی انٹرنیٹ غائب

ٹاورز بل ویلے سر دے رہے نیں تے فیر 24 گھنٹے بجلی دینی چاہیدی اے: چیئرمین پی ٹی اے؛ ٹیلی کام ٹاورز نوں سولر تے منتقل کیتا جائے تے لیتھیئم بیٹریاں لائیاں جان: قائمہ کمیٹی؛ کمیٹی ممبراں دا موبائل سگنلز تے انٹرنیٹ سروس دی خرابی تے وی شدید تشویش دا اظہار

اسلام آباد

پاکستان وچ ٹیلی کام کمپنیاں وی لوڈشیڈنگ توں تنگ نیں۔ ٹیلی کام ٹاورز تے بجلی بند ہوندے ہی انٹرنیٹ سروس متاثر ہو جاندی اے۔ چیئرمین پی ٹی اے نے قومی اسمبلی دی قائمہ کمیٹی برائے انفارمیشن ٹیکنالوجی نوں بریفنگ دیندیاں ہویاں دسیا کہ لوڈشیڈنگ اک سنگین مسئلہ اے جس دے حل لئی نیپرا نوں خط لکھ دتا گیا اے۔ اسیں پورے پاکستان وچ اک سروے کیتا اے جس دے مطابق اوسطاً (average) 10 گھنٹے لوڈشیڈنگ ہو رہی اے، جدکہ کجھ علاقیاں وچ 18، 18 گھنٹے تیکر لوڈشیڈنگ ہوندی اے۔

اسیں نیپرا نوں لکھے گئے خط وچ دسیا کہ موبائل ٹاورز دے بجلی دے بل پورے تے ویلے سر (بروقت) ادا کیتے جاندے نیں تے ایہہ بجلی چوری وچ وی ملوث نہیں ہوندے۔ جے بل ویلے سر ادا ہو رہے نیں تاں ڈسکوز نوں ٹاورز نوں 24 گھنٹے بجلی فراہم کرنی چاہیدی اے۔ اوہناں نے ہور دسیا کہ ایس معاملے تے وزیراعظم نے اک کمیٹی بنائی اے جیہڑی ڈسکوز نال ایہہ معاملہ اٹھائے گی۔ ایہہ گل وی زیرِ غور اے کہ ٹیلی کام ٹاورز لئی الگ فیڈرز کیویں مختص کیتے جان۔ کمیٹی دے ممبراں نے تجویز دتی کہ ٹیلی کام ٹاورز نوں سولر تے منتقل کیتا جائے تے لیتھیئم بیٹریاں نصب کیتیاں جان تاں جے ایہہ مسئلہ حل ہو سکے۔

ایس تے وفاقی وزیر آئی ٹی شزا فاطمہ خواجہ نے آکھیا کہ ایس تجویز تے وی غور کیتا جا رہا اے تے چین وچ اک ایہو جہی کمپنی نال ملاقات ہوئی اے جیہڑی سولر مائیکرو گرڈز لگاندی اے جنہاں دا نیشنل گرڈ نال کوئی تعلق نہیں ہوندا۔ ایس توں علاوہ، پاکستان وچ ٹیلی کام ٹاورز توں چوری دے واقعیاں وچ وی وادھا ہویا اے۔ شزا فاطمہ خواجہ نے دسیا کہ پاکستان وچ ٹیلی کام ٹاورز تے چوری دے 9 ہزار واقعے ہو چکے نیں۔ ٹاورز توں ڈیزل تے دوجے آلات چوری کیتے جاندے نیں، جدکہ کجھ علاقیاں وچ تاں پورے دے پورے ٹاورز ہی کھول (ڈسمینٹل کر) دتے گئے نیں۔ اوہناں آکھیا کہ پاکستان وچ 50 توں 55 ہزار ٹیلی کام ٹاورز موجود نیں۔

کمیٹی ممبراں نے پاکستان وچ موبائل سگنلز تے انٹرنیٹ سروس دی خرابی تے شدید تشویش دا اظہار کیتا۔ مہیش کمار نے آکھیا کہ اج کل موبائل سروسز بہت خراب نیں، موبائل تے آدھا منٹ گل کرن توں بعد ہی سگنلز ڈراپ ہو جاندے نیں، جس تے شزا فاطمہ خواجہ نے دسیا کہ پاکستان وچ صارفین اوسطاً پورے مہینے دے انٹرنیٹ استعمال لئی 285 روپے ادا کردے نیں۔ پاکستان وچ انٹرنیٹ صارفین دی گنتی دوگنی ہو چکی اے۔ صارفین اوسطاً پورے مہینے دے انٹرنیٹ استعمال لئی اک ڈالر توں وی گھٹ ادا کردے نیں۔ پاکستان وچ انٹرنیٹ لئی صارفین دی اوسط ادائیگی گوانڈھی ملـ…