ایف بی آر کاروباری طبقے دے جائز رپھڑ حل کرے: وزیر اعظم

سلام آباد (نامہ نگار، مانیٹرنگ ڈیسک)

وزیراعظم شہباز شریف نے آکھیا اے کہ پاکستان دی معیشت استحکام دی راہ اُتے ٹُر پئی اے، چالو سال معاشی ترقی تے کاروباری سرگرمیاں نوں ودھان دا سال ہوئے گا، کاروباری برادری ملکی معیشت دی ریڑھ دی ہڈی اے، اوہناں نوں زیادہ پیداوار تے برآمدات نوں ودھان لئی ہر ممکن سہولت دتی جائے گی۔ ایف بی آر اصلاحات تے ٹیکس نظام بارے جائزہ اجلاس دی صدارت کردے ہوئے وزیراعظم نے آکھیا کہ ایف بی آر کاروباری طبقے نال تعاون کرے تے اوہناں دے جائز رپھڑ پہل دے حساب نال حل کرے، ایف بی آر دے سینئر افسر ہر مہینے دے پہلے ہفتے وچ کراچی دا دورہ کرن تاں جے کاروباری برادری نال سدھا رابطہ ہو سکے تے اوہناں دے مسائل بنا کسے دیر دے حل ہوݨ۔ اوہناں آکھیا کہ حکومت دا مقصد کاروبار وچ آسانی پیدا کرنا، سرمایہ کاری تے برآمدات نوں ودھانا، تے ٹیکس نظام نوں ہور شفاف تے سکھالا بنانا اے۔

اجلاس نوں ایف بی آر دی کارکردگی تے جاری اصلاحات لاگو کرن بارے بریفنگ وچ دسیا گیا کہ کھنڈ (شوگر)، سیمنٹ، ٹوبیکو، ٹائلز تے فرٹیلائزرز دیاں صنعتاں وچ پروڈکشن مانیٹرنگ سسٹم لا دتا گیا اے۔ ٹیکسٹائل تے مشروبات دیاں صنعتاں وچ پروڈکشن مانیٹرنگ سسٹم لاؤن دا کم چالو اے۔ اس دوران لائیو سٹاک دی صلاحیت بارے ہوݨ والے قومی سیمینار نال خطاب کردے ہوئے وزیراعظم نے آکھیا کہ لائیو سٹاک دے شعبے وچ بے پناہ گنجائش اے، اک ہزار نوجوان زرعی گریجویٹس نوں میرٹ دی بنیاد اُتے چین بھیجیا جا چکیا اے، ہور اک ہزار منڈے کڑیاں نوں تربیت لئی چالو سال چین بھیجیا جائے گا۔ وزیراعظم نے آکھیا کہ ملکی لائیو سٹاک دے شعبے وچ وڈی گنجائش اے۔ اوہناں آکھیا کہ لائیو سٹاک دے شعبے دی ترقی لئی وفاق تے صوبیاں نوں مل کے کم کرنا ہوئے گا، زراعت تے لائیو سٹاک دے شعبیاں وچ محنت نال کم کیتا جائے تے اک سال وچ معیشت نوں بہتر بنایا جا سکدا اے۔ اوہناں اعلان کیتا کہ جانوراں دیاں بیماریاں مکاون لئی جنے وی فنڈز چائیدے ہوݨ گے اوہ دتے جاݨ گے۔

اوہناں متعلقہ حکام نوں ہور اک ہزار زرعی گریجویٹس نوں تربیت لئی چین بھیجن دے انتظام کرن دی ہدایت دیندے ہوئے آکھیا کہ ایہ نوجوان جدید تربیت حاصل کر کے ملک نوں ترقی دی راہ اُتے ٹورن گے۔ اس توں علاوہ اقوامِ متحدہ دے انڈر سیکرٹری جنرل برائے انسانی امور تے ایمرجنسی ریلیف کوآرڈی نیٹر، ٹام فلیچر نے وزیراعظم شہباز شریف نال ملاقات کیتی۔ وزیراعظم نے دنیا بھر وچ اوکھی انسانی حالتاں نال نبڑن لئی اقوامِ متحدہ دے ادارہ برائے رابطہ انسانی امور (OCHA) ولوں کیتیاں گیاں قیمتی خدمتاں نوں سلاہیا۔ اوہناں نے خاص طور اُتے 2022 دے تباہ کن ہڑ (سیلاب) دے دوران پاکستان دی مدد کرن اُتے OCHA دا شکریہ ادا کیتا، پر اوہناں نے اس گل اُتے زور دتا کہ موسماتی تبدیلیوں پاروں ودھدے ہوئے خطریاں نال چنگی طرحاں نبڑن لئی تیاری، ساہن اوکھے ویلے برداشت دی صلاحیت (مزاحمتی صلاحیت) تے ہر پدھر اُتے باہمی رابطے تے تعاون نوں ہور مضبوط کرن دی لوڑ اے۔

وزیراعظم نال چیئرمین نیشنل ڈیزاسٹر مینجمنٹ اتھارٹی (NDMA) لیفٹیننٹ جنرل انعام حیدر ملک نے ملاقات کیتی، وزیراعظم نے مونسون دی بارشاں دوران صوبائی حکومتاں تے صوبائی ڈیزاسٹر مینجمنٹ اتھارٹیز وچ روابط ہور بہتر بناؤن دی ہدایت دتی، وزیراعظم نوں ملک وچ مونسون بارشاں دوران کسے وی ہنگامی صورتحال دی تیاری بارے بریفنگ دتی گئی۔ وزیرِ مملکت برائے داخلہ طلال چودھری نے بھی شہباز شریف نال ملاقات کیتی، وزارتِ داخلہ نال جڑے معاملیاں اُتے گل بات سمیت ملک دی مجموعی تے سیاسی صورتحال اُتے دونویں دھریں وچکار وچار وٹاندرا کیتا گیا۔ وزیراعظم محمد شہباز شریف نال سابق وزیراعلیٰ بلوچستان عبدالمالک بلوچ نے وفد نال ملاقات کیتی تے صوبے وچ امن و امان دی مجموعی صورتحال تے آپسی دلچسپی دے دوجے معاملیاں اُتے گل بات کیتی گئی۔ سارک دے سیکرٹری جنرل، محمد غلام سرور نے وزیراعظم ہاؤس وچ وزیراعظم نال الوداعی ملاقات کیتی، وزیراعظم نے علاقائی تعاون نوں ودھان وچ سیکرٹری جنرل دیاں مخلصانہ خدمتاں تے قیادت نوں سلاہیا۔ وزیراعظم شہباز شریف تے اقوامِ متحدہ دے سیکرٹری جنرل دے عہدے دی امیدوار کیرولن روڈریگز برکیٹ وچکار ٹیلیفون اُتے گل بات ہوئی، وزیراعظم نے کثیر الجہتی نظام نوں تکڑا کرن بارے پاکستان دی ترجیح اُتے زور دتا تے عالمی امن و سلامتی لئی اقوامِ متحدہ دے اہم کردار دی حمایت کیتی۔