چینی اداریاں نال 20 ارب ڈالر دیاں مفاہمتی یادداشتاں اُتے اتفاق
ارماسیوٹیکل، بائیوٹیکنالوجی شعبیاں وچ 9 نویں معاہدے طے پا چکے، 150 چینی کمپنیاں نال سرمایہ کاری لئی رابطے، ادارہ جاتی تعاون نوں ہور مؤثر بناؤن اُتے اتفاق ہو گیا، پاکستان وچ معیاری سرمایہ کاری حکومت دی پہلی ترجیح، وعدیاں نوں جلد عملی منصوبیاں وچ بدلنا ضروری اے: سینیٹر محمد اورنگزیب، خلیل ہاشمی نال ملاقات وچ گل بات
اسلام آباد
وزیرِ خزانہ سینیٹر محمد اورنگزیب نال چین وچ پاکستان دے سفیر خلیل ہاشمی نے ملاقات کیتی جیہدے وچ پاکستان تے چین وچکار معاشی تعاون، سرمایہ کاری تے دوطرفہ تجارتی تعلقات نوں ودھان اُتے تفصیل نال گل بات کیتی گئی۔ وزیرِ خزانہ نے آکھیا کہ پاکستان وچ معیاری سرمایہ کاری حکومت دی پہلی ترجیح اے جدکہ برآمدات وچ اضافے تے نجی شعبے دے تعاون اُتے خاص دھیان دتا جا رہیا اے۔ اوہناں اس گل اُتے زور دتا کہ سرمایہ کاری دے وعدیاں نوں جلد توں جلد عملی منصوبیاں وچ بدلنا ضروری اے تے سرمایہ کاراں دا بھروسہ ودھان لئی تگڑے قدم چکے جا رہے نیں۔
ملاقات وچ پاکستان دے سفیر خلیل ہاشمی نے دسیا کہ چینی اداریاں نال 20 ارب ڈالر مالیت دیاں مفاہمتی یادداشتاں (ایم او یوز) اُتے اتفاق ہو چکیا اے جدکہ 20 ارب ڈالر توں ودھ دے سرمایہ کاری معاہدیاں اُتے عملدرآمد جاری اے۔ اوہناں دسیا کہ فارماسیوٹیکل تے بائیوٹیکنالوجی دے شعبیاں وچ 9 نویں معاہدے طے پا چکے نیں، تے 150 توں ودھ چینی کمپنیاں نال سرمایہ کاری لئی رابطے کیتے جا رہے نیں۔ اعلامیے مطابق ملاقات وچ مینوفیکچرنگ، لاجسٹکس، ٹیکسٹائل، برآمدی صنعتاں، چھوٹے تے درمیانے درجے دے کاروبار (ایس ایم ایز) وچ تعاون ودھان، کاروباری رابطے مضبوط کرن تے سرمایہ کاری لئی ادارہ جاتی تعاون نوں ہور مؤثر بناؤن اُتے اتفاق کیتا گیا۔ اجلاس وچ چینی مالیاتی اداریاں، اے آئی آئی بی (AIIB)، سلک روڈ فنڈ، پاک چین آزاد تجارتی معاہدے دے تحت تعاون نوں ودھان تے پاکستانی چیزاں دی چینی منڈی تک رسائی نوں بہتر بناؤن دے امکاناں دا وی جائزہ لیا گیا۔
