آئینی عدالت: حارث سٹیل مل ریفرنس ختم کرن دے خلاف نیب نوں نوٹس

دوجیاں دھراں نوں اگلی پیشی تیکر سٹیٹس کو (حالتِ زار برقرار رکھن) دی ہدایت، اگلی پیشی عدالتی چھٹیاں توں بعد

ایرانی ڈیزل سمگلنگ کیس وچ کسٹمز ولوں مقدمے دا مال واپس کرن تے حکمِ امتناع دی استدعا مسترد

اسلام آباد (کورٹ رپورٹر)

وفاقی آئینی عدالت نے حارث سٹیل مل ریفرنس مکاؤن (ختم کرن) دے خلاف دائر اپیل تے نیب نوں نوٹس جاری کردیاں ہویاں دوجیاں دھراں نوں اگلی پیشی تیکر سٹیٹس کو برقرار رکھن دی ہدایت کر دتی اے، کیس دی اگلی پیشی عدالتی چھٹیاں توں بعد ہوئے گی۔ جسٹس حسن اظہر رضوی دی سربراہی وچ تن میمبری بینچ نے ایس کیس دی سماعت کیتی۔ بینک دے وکیل خواجہ حارث نے آکھیا کہ مقدمے وچ جلع سازی نال تیار کیتے گئے کاغذات تے جعلی شناختی کارڈاں دی بنیاد تے قرضہ لیا گیا جیہڑا فراڈ دی اک وڈی تے سنگین مثال اے۔

جسٹس حسن اظہر رضوی نے پچھیا کہ کیہ اوس ویلے کاغذات نوں چیک (کراس ویریفائی) نہیں سی کیتا جاندا؟ پہلے احتیاط نہیں کیتی جاندی تے جدوں وقوعہ ہو جائے تاں فیر جاگدے نیں۔ خواجہ حارث نے آکھیا کہ مقدمہ مک جاؤن توں بعد بینک گارنٹی واپس لین دا کم شروع ہو چکیا اے، عدالت آخری فیصلے تیکر حکمِ امتناع جاری کرے۔ جسٹس عامر فاروق نے ریمارکس دتے کہ مقدمے وچ بنیادی قانونی نکتہ ایہہ اے کہ کیہ نیب دے ریفرنس مکاؤن دے فیصلے نوں چیلنج کیتا جا سکدا اے یا نہیں۔ عدالت نوں ایہہ طے کرنا پئے گا کہ ایہہ اپیل سماعت دے لائق ہے وی کہ نہیں۔

ایسے دوران ایرانی ڈیزل دی سمگلنگ بارے ایف آئی آر خارج کرن دے خلاف کسٹمز دی اپیل تے سماعت کردیاں ہویاں وفاقی آئینی عدالت دے چیف جسٹس امین الدین خان دی سربراہی وچ تن میمبری بینچ نے مقدمے دا مال واپس کرن تے حکمِ امتناع جاری کرن دی کسٹمز دی استدعا مسترد کر دتی۔ جسٹس علی باقر نجفی نے ریمارکس دتے کہ ایف آئی آر صرف بدنیتی ثابت ہون تے ای خارج کیتی جا سکدی اے، ایس مقدمے وچ بدنیتی کتھے ثابت ہوندی اے؟ عدالت نے کیس دی اگلی پیشی ان مٹھے چروکے (غیر معینہ مدت) لئی ملتوی کر دتی۔ وفاقی آئینی عدالت نے سندھ پبلک سروس کمیشن نوں وڈا ریلیف دیندیاں ہویاں سندھ ہائیکورٹ ولوں کمیشن دے خلاف انکوائری، امتحاناں وچ پاس ہون والے امیدواراں دے انٹرویو روکن تے فیل ہون والے امیدواراں دے پرچے مڑ چیک کرن دے حکماں نوں معطل کر دتا تے اگلی پیشی عدالتی چھٹیاں توں بعد تیکر ملتوی کر دتی۔