آزاد کشمیر، بلوچستان، پختونخوا دے رپھڑاں دا سیاسی حل کڈھیا جائے: جماعتِ اسلامی

آئینی تے عدالتی بحران دی بنیادی وجہ آئین تے جمہوری اصولاں توں دوری اے، 26ویں تے 27ویں ترمیم واپس لے کے آئین بحال کیتا جائے: مجلسِ شوریٰ دیاں قرارداداں

لاہور (سٹاف رپورٹر، سیاسی نمائندہ)

جماعتِ اسلامی پاکستان دی مرکزی مجلسِ شوریٰ نے ملک دی مجموعی سیاسی، آئینی، معاشی تے امن و امان دی حالت تے ڈونگھی چنتا (گہری تشویش) دا اظہار کردیاں ہویاں کئی قرارداداں پاس کر لیاں نیں۔ قرارداداں وچ آئین تے قانون دی بالادستی، صاف شفاف چناؤ (انتخابات)، قومی سیاسی گل بات (مکالمے)، بلوچستان تے خیبر پختونخوا دے رپھڑاں دے سیاسی حل، دہشت گردی مکاؤن لئی نویں حکمتِ عملی، پاک افغان تعلقات وچ بہتری تے آزاد جموں و کشمیر دے بحران نوں مذاکرات راہیں حل کرن تے زور دتا گیا اے۔ سیاسی قرارداد وچ آکھیا گیا اے کہ ملک نوں پیش آئینی، عدالتی، سیاسی تے معاشی بحران دی اصل وجہ آئین تے جمہوری اصولاں توں انحراف (پاسے ہونا) اے۔

قرارداد دے مطابق 2024ء دے چناؤ وچ مبینہ دھاندلی تے عوامی مینڈیٹ دی خلاف ورزی دے نتیجے وچ قائم ہون والا ہائبرڈ نظام فیل ہو چکا اے، جس پاروں حکومتی تے ریاستی اداریاں تے لوکاں دا اعتماد بری طرحاں متاثر ہویا اے۔ شوریٰ نے مطالبہ کیتا کہ آئین وچ کیتیاں گئیاں 26ویں تے 27ویں ترمیم نوں واپس لے کے متفقہ آئینی ڈھانچہ بحال کیتا جائے، عدلیہ نوں آزاد تے بااختیار بنایا جائے تے ملک وچ صاف، غیر جانبدار تے متناسب نمائندگی تے مبنی انتخابی نظام نافذ کیتا جائے۔ قرارداد وچ آکھیا گیا اے کہ بلوچستان وچ بدامنی، جبری گمشدگیاں، سیاسی بے اعتمادی، وسیلیاں دی غیر منصفانہ ونڈ تے عوامی محرومیاں نے صورتِ حال نوں چوکھی تشویشناک بنا دتا اے۔

شوریٰ نے صاف آکھیا کہ فوجی آپریشن مسلیاں دا حل نہیں، بلکہ بلوچستان دے بحران دا پکا حل لوکاں دے اعتماد دی بحالی، سیاسی گل بات، آئینی حقاں دی فراہمی تے وفاقی حکومت دی میزبانی وچ سارے سٹیک ہولڈرز تے مشتمل قومی کانفرنس کروان وچ اے۔ جماعتِ اسلامی نے بلوچستان دے مسئلے تے قومی سطح دی کانفرنس کروان دا وی اعلان کیتا۔ قرارداد وچ قومی ایکشن پلان تے نویں سرے توں قومی اتفاقِ رائے پیدا کرن، لوکاں دا اعتماد بحال کرن تے وفاق تے صوبیاں وچکار تال میل ودھاؤن تے زور دتا گیا۔

مرکزی مجلسِ شوریٰ نے بھارت ولوں سندھ طاس معاہدے دی یکطرفہ معطلی، پانی دے دباؤ تے مبینہ پراکسی جنگ نوں خطے دے امن لئی خطرہ قرار دیندیاں ہویاں حکومت توں مطالبہ کیتا کہ پاکستان دے پانی دے حقاں دی راکھی لئی قومی تے بین الاقوامی پدھر تے تکڑے سفارتی قدم چکے جان۔ آزاد جموں و کشمیر دی صورتِ حال تے شوریٰ نے جوائنٹ عوامی ایکشن کمیٹی دے احتجاج دے تناظر وچ آکھیا کہ ریاستی طاقت ورتن دی بجائے گل بات راہیں بحران حل کیتا جائے، قرارداد وچ ویلے سر، آزادانہ تے شفاف چناؤ کروان تے وی زور دتا گیا، جڈوں کہ آکھیا گیا کہ لوکاں دی پرامن جدوجہد اوہناں دا بنیادی حق اے، پر ایسے کماں توں بچیا جائے جنہاں نال تحریکِ آزادیِ کشمیر نوں نقصان پہنچے۔