ایف بی آر افسران دے چھوٹی دکاناں وچ وڑن (داخلے) تے پابندی لا دتی گئی
دکانداراں نوں آئرس ویب پورٹل یا موبائل ایپ تے سادہ ریٹرن جمع کروانا ہوئے گا، اپنے جائز اثاثے ظاہر کر سکن گے
رجسٹرڈ دکانداراں نوں اپنی دکان دے باہر لاؤن لئی ہری (سبز) پلیٹ جاری ہوئے گی، ریونیو ڈویژن دا نوٹیفیکیشن جاری
اسلام آباد (مانیٹرنگ ڈیسک)
فیڈرل بورڈ آف ریونیو (FBR) دے ان لینڈ ریونیو افسراں دے چھوٹی دکاناں وچ وڑن (داخلے) تے پابندی لا دتی گئی اے۔ ریونیو ڈویژن نے ایس سلسلے وچ نوٹیفیکیشن جاری کر دتا اے، جس دے مطابق دکانداراں نوں آئرس (Iris) ویب پورٹل یا موبائل ایپلی کیشن تے سادہ ریٹرن جمع کروانا ہوئے گا، ریٹرن وچ خرید و فروخت، خرچے تے منافع دی تفصیل دسی جائے گی۔ نوٹیفیکیشن دے مطابق دکانداراں نوں ریٹرن وچ اپنے جائز اثاثے ظاہر کرن دی سہولت دتی گئی اے، دکاندار اپنے پورے کاروباری حجم تے اک فیصد ٹیکس دین گے تے اوہناں نوں واجب الادا ٹیکس توں ودہولڈنگ انکم ٹیکس دی رقم ایڈجسٹ کرن دی اجازت ہوئے گی۔
نوٹیفیکیشن دے مطابق رجسٹرڈ دکانداراں نوں اپنی دکان دے باہر لاؤن لئی ہری (سبز) پلیٹ جاری کیتی جائے گی، ہری پلیٹ والی دکاناں وچ ان لینڈ ریونیو افسراں نوں ٹیکس معاملیاں لئی وڑن دی اجازت نہیں ہوئے گی۔ ایس ہری پلیٹ تے خاص کیو آر (QR) کوڈ، دکاندار دا ناں، این ٹی این (NTN) نمبر تے دکان دا پتہ لکھیا ہوئے گا۔ ایہہ انتظام ٹیکس سال 2026 لئی 20 کروڑ روپے سالانہ کاروبار کرن والی دکاناں لئی اے، ٹیئر ون (Tier-1) ریٹیلرز تے گہنے (زیورات) ویچن والے دکاندار ایس وچ شامل نہیں ہون گے، ایس لئی ایس آر او (SRO) 1109 (2026) جاری کر دتا گیا اے۔
