کورونا دا ناں لے کے جمہوریت نوں نقصان پہنچایا جا رہیا اے

اسٹاک ہوم: انسٹی ٹیوٹ فارڈ یموکریسی اینڈ الیکٹورل اسسٹنس ( آئیڈیا) تے 500مشہور سیاسی و سماجی شخصیات دے دستخطاں نال اک خط جاری ہوئیا،جس اندر خبردار کیتا گیا اے کہ کئی ملکاں اندر کورونادا نال لیہ کے جمہوریت نوں نقصان تے انسانی حقوق نوں پامال کیتا جا رہیا اے ،اسٹاج ہوم ، سویڈن اندر واقع ، آئیڈیا توں جاری ہوون والے خط اُتے مختلف ملکاں دے پرانے صدر ، وزیر اعظم ، ماہرین قانون ، دانشور تے نوبل انعام یافتہ سمیت تقریباََ 500سیاستداناں دے دستخط نیں،ایس خط اندر آکھیا گیا اے کہ آمرانہ طرز حکمرانی والے ملکاں توں علاوہ جمہوری نظام حکومت دے حامل کئی ملکاں اندر وی کورونا وائرس نوں ساہمنے رکھدیا ہویاں انسانی حقوق دی پامالی تے جمہوریت دے منافی اقدامات دا سلسلہ ودھددا جا رہیا اے،ایس تو علاوہ کئی ملکاں اندر حکومتاں نے اپنے سیاسی مخالفین نوں خموش رکھن لئی وی کورونا دا ناں لیہ کے پابندی تے خفیہ نگرانی ورگے اقدامات کیتے نیں،خط اندر ایس امر اُتے تشویش دا اظہار کیتا گیا اے کہ جمہوری طور تے منتخب ہوون والی کئی حکومتاں وی کورونا توں جان چھڈان لئی ہنگامی حالات دا نام لیہ کہ اپنے خصوصی اختیارات دا غیر ضروری تے نا جائز استعمال کر رہیاں نیں جس دے تحت کرفیو تے بھاری جرمانیاں توں علاوہ سسنر شپ دے ذریعے نہ صرف میڈیا بلکہ اختلاف رائے رکھن والیاں نوں وی خموش کیتا جا رہیا اے،مزید ایہ کہ ایس خط اندر پوری دُنیا دی توجہ وی اک طرف کر دتی گئی اے ،کہ کئی ملکاں اندر کورونا توں جان چھڈان لئی انتظامیہ دے اختیارات وی ودھدا دتے گئے نیں ،جس وجہ نال اینہاں ملکاں اندر بوہت بے چینی پھیل رہیی اے ،کورونا دی وجہ نال ہن تک دُنیا وچ 66انتخابات ملتوی ہو چُکے نیں ،جس اندر22قومی سطح دے انتخابات وی شامل سن ،بہر حال مزید ایہ کہ جنہاں 50ملکاں اندر میڈیا اُتے پابندیاں لائیاں گیئاں اوہناں وچ 21جمہوری ملک شامل نیں