آبنائے ہرمز وچ تجارتی جہازاں تے حملیاں وچ 2 افراد جاں بحق ہوئے، انٹرنیشنل میری ٹائم آرگنائزیشن
انٹرنیشنل میری ٹائم آرگنائزیشن (IMO) دے مطابق آبنائے ہرمز وچ منگل نوں تجارتی بحری جہازاں تے ہون والے حملیاں وچ ہلاکتاں دی گنتی ودھ کے 2 ہو گئی اے۔
آئی ایم او نے اپنے بیان وچ آکھیا کہ اوہناں نوں آبنائے ہرمز تے ایس دے آلے دوالے وچ پچھلی رات توں تجارتی جہازاں تے ہون والے تازہ حملیاں تے شدید تشویش اے، جنہاں وچ گھٹ توں گھٹ 2 بحری کارکن جاں بحق جدکہ کئی دوجے زخمی ہوئے نیں۔
ایہ بیان ایسے ویلے ساہمنے آیا اے جدوں ایران تے عمان دی سمندری حدود وچ 2 تجارتی جہازاں نوں نشانہ بناؤن دا الزام لایا جا رہا اے۔
واضح رہے کہ متحدہ عرب امارات دی وزارتِ دفاع نے آکھیا سی کہ آبنائے ہرمز وچ 2 اماراتی آئل ٹینکرز نوں ایرانی کروز میزائلاں نال نشانہ بنایا گیا۔
اماراتی وزارتِ دفاع دے مطابق حملے دے نتیجے وچ اک جہاز دے عملے دا اک بھارتی ممبر ہلاک تے 8 افراد زخمی ہو گئے۔
بھارت دے شہر نویں دہلی وچ اک بھارتی بحری عملے دے ممبر دی ہلاکت تے حکومت نے احتجاج کردے ہوئے اک ایرانی سفارت کار نوں سد (طلب کر) لیا اے۔
