پٹرول دے بحران دا خدشہ، آئل کمپنیاں ولوں حکومت نوں ریڈ الرٹ
پٹرولیم مصنوعات دی درآمد وچ کسٹم دیاں رکاوٹاں سپلائی چین لئی خطرہ، چٹھی 66.7 ارب دے پرائس ڈیفرینشل کلیمز دی عدم ادائیگی نال مالی دباؤ ودھ گیا، کونسل
کراچی (کامرس رپورٹر، دنیا نیوز) ملک وچ پٹرول دے بحران دا خدشہ پیدا ہو گیا اے۔ آئل کمپنیز ایڈوائزری کونسل (او سی اے سی) نے حکومت نوں سپلائی دی صورتحال تے ریڈ الرٹ جاری کردیاں ہویاں فوراً قدم چکن دا مطالبہ کیتا اے۔ او سی اے سی نے وزیر توانائی (پٹرولیم ڈویژن) علی پرویز ملک نوں لکھی گئی ہنگامی چٹھی وچ خبردار کیتا اے کہ پٹرولیم مصنوعات دی درآمد وچ کسٹم دیاں رکاوٹاں سپلائی چین لئی خطرہ بن رہیاں نیں، جدکہ ملک وچ موجود ذخیرہ صرف 15 دناں لئی کافی اے۔ چٹھی دے مطابق ایس ویلے مقامی پدھر تے تقریباً 3 لکھ 70 ہزار ٹن پٹرولیم دا ذخیرہ موجود اے جدکہ کسٹم کلیئرنس وچ دیری پاروں درآمد کیتے گئے پٹرول دے کئی کارگو مارکیٹ وچ دستیاب نہیں ہو پا رہے۔
او سی اے سی نے دَسیا کہ کسٹم وی بوک سسٹم وچ مسلیاں پاروں 15 توں 17 جولائی نوں پہنچن والے فیول کارگو دی کلیئرنس وی خطرے وچ اے۔ آئل کمپنیاں دا کہنا اے کہ 66.7 ارب روپے دے زیرِ التوا پرائس ڈیفرینشل کلیمز دی عدم ادائیگی نال مالی دباؤ ودھ گیا اے۔ کمپنیاں نے حکومت توں فوراً واجبات دی ادائیگی تے درآمدی پٹرولیم مصنوعات دی کسٹم کلیئرنس وچ رکاوٹاں دور کرن دا مطالبہ کیتا اے۔ چٹھی وچ ہور کہیا گیا کہ پاکستان اسٹیٹ آئل نوں جون 2026 وچ ہور پٹرولیم مصنوعات درآمد کرن دی اجازت نہ ملن پاروں ذخائر گھٹ ہوئے نیں، جس نال اگے جا کے سپلائی متاثر ہون دا خدشہ ودھ گیا اے۔
