بلوچستان: آپریشن شعبان وچ ہور 3 دہشت گرد ہلاک

کوئٹہ (سٹاف رپورٹر) بلوچستان وچ پاک فوج، ایف سی تے پولیس دے سانجھے “آپریشن شعبان” وچ ہور 3 خارجی دہشت گرد ہلاک ہو گئے۔

سکیورٹی ذرائع دے مطابق سکیورٹی فورسز دی فتنہ الخوارج دے خلاف علاقے وچ کارروائیاں جاری نیں، خارجیاں نوں زمینی تے فضائی کارروائیاں وچ نشانہ بنایا جا رہیا اے۔ آپریشن شعبان وچ ہلاک ہون والے دہشت گرداں دی گنتی ودھ کے 88 ہو گئی اے۔

سکیورٹی ذرائع نے دَسیا کہ سکیورٹی فورسز دی تگڑی کارروائی پاروں خارجی دہشت گرداں نوں بھاری نقصان دا ساہمنا کرنا پیا اے، تے دہشت گرداں دے ٹھکانے وی کامیابی نال تباہ کیتے گئے نیں۔ سکیورٹی ذرائع دے مطابق 5 جولائی توں ہن تک بلوچستان وچ وکھو وکھ خُفیہ معلومات دی بنیاد تے کیتے گئے آپریشنز وچ مجموعی طور تے 126 دہشت گرد ہلاک کیتے جا چکے نیں۔

لنگھے ہوئے دن وی آپریشن شعبان دے دوران سکیورٹی فورسز نے 6 دہشت گرداں نوں ہلاک کیتا سی۔ سکیورٹی ذرائع دا کہنا سی کہ سکیورٹی فورسز نے کارروائی دے دوران دہشت گرداں دی گڈی نوں وی کامیابی نال نشانہ بنایا، جس نال دہشت گرداں دا بھاری نقصان ہویا۔ ذرائع نے صاف لفظاں وچ کہیا کہ بلوچستان توں دہشت گردی دے پورے خاتمے تک “آپریشن شعبان” بنا کسے رکاوٹ دے جاری رہے گا تے آخری دہشت گرد دے خاتمے تک کارروائیاں کیتیاں جاندیاں رہن گیاں۔