“پٹرولیم مصنوعات دے وافر ذخائر، مصنوعی قلت پیدا کرن والیاں دے خلاف سخت کارروائی کیتی جائے: شہباز شریف”

خطے وچ غیر یقینی صورتحال، کشیدگی ودھن نال ملکی معیشت متاثر ہون دا ڈر

ہر ممکنہ چیلنج نال نمٹن لئی مکمل تیاری رکھو، جامع لائحہ عمل تیار کیتا جائے: وزیراعظم

سادگی مہم وچ عوام دا بھرپور کردار، سبسڈی راہیں ایندھن دیاں قیمتاں وچ اضافے دے اثرات نوں مؤثر طریقے نال قابو کیتا؛ اجلاس نال خطاب، ایمل ولی تے ہوراں دی ملاقاتاں

اسلام آباد (نامہ نگار)

وزیراعظم شہباز شریف نے ہدایت کردے ہوئے آکھیا اے کہ خطے دی صورتحال وچ غیر یقینی برقرار اے، ہر ممکنہ چیلنج نال نمٹن لئی مکمل تیاری رکھی جائے، پٹرول دی قلت پیدا نہ ہون دتی جائے۔ پچھلی سادگی تے کفایت شعاری مہم وچ عوام نے بھرپور کردار ادا کیتا جس اُتے دلوں شکرگزار ہاں۔ اللہ دے فضل و کرم نال ملکی معیشت مستحکم اے، پر لوڑ پین اُتے ویلے سر اقدامات لئی اک جامع لائحہ عمل تیار کیتا جائے۔ وزیراعظم دی زیرِ صدارت خطے وچ کشیدگی دے ملکی معیشت اُتے اثرات دا جائزہ لین لئی اک اجلاس ہویا جس وچ سادگی تے کفایت شعاری دے اقدامات اُتے رپورٹ پیش کیتی گئی۔

وزیراعظم نے پٹرولیم مصنوعات تے توانائی بچت دی قومی مہم وچ عوام دے بھرپور تعاون دی تعریف کردے ہوئے آکھیا کہ اللہ دے فضل و کرم نال ملکی معیشت ایس ویلے مستحکم اے، لوڑ پین اُتے ویلے سر اقدامات لئی جامع لائحہ عمل مرتب کیتا جائے۔ ویلے سر تے مؤثر حکومتی حکمتِ عملی پاروں ملک وچ ایندھن دی فراہمی دی صورتحال دا بہترین طریقے نال انتظام کیتا گیا۔ اوہناں دا کہنا سی کہ حکومت نے عام بندے، موٹر سائیکل سواراں، رکشہ ڈرائیوراں تے ٹرانسپورٹرز نوں تحفظ فراہم کیتا۔ حکومت ولوں دتی گئی سبسڈی دے نتیجے وچ ایندھن دیاں قیمتاں وچ اضافے دے اثرات نوں مؤثر انداز وچ کنٹرول کیتا گیا۔

صوبائی حکومتاں نال مل کے پٹرولیم مصنوعات دی مصنوعی قلت پیدا کرن والیاں دے خلاف سخت کارروائی کیتی جائے۔ وزیراعظم نے آکھیا کہ خطے وچ کشیدگی ودھن دے ماڑے اثرات پاروں ملکی معیشت دے مستقبل وچ متاثر ہون دا خدشہ اے۔ جس طرح پچھلی سادگی مہم وچ عوام نے بھرپور ساتھ دتا، اسے طرز اُتے کفایت شعاری نوں قومی پدھر اُتے اپناؤنا پوے گا۔ اجلاس وچ بریفنگ دوران دسیا گیا کہ ملکی ضروریات دے مطابق پٹرولیم مصنوعات دے وافر ذخائر موجود نیں تے مستقبل لئی ایہدی فراہمی نوں یقینی بنا لیا گیا اے۔

اجلاس وچ وفاقی وزراء احد خان چیمہ، محمد اورنگزیب، علی پرویز ملک، اویس خان لغاری، وزیرِ مملکت بلال اظہر کیانی، معاونِ خصوصی طارق باجوہ، گورنر سٹیٹ بینک جمیل احمد تے اعلیٰ سرکاری حکام نے شرکت کیتی۔

اسے دوران وزیراعظم نال عوامی نیشنل پارٹی (ANP) دے صدر سینیٹر ایمل ولی خان نے ملاقات کیتی جس وچ سیاسی معاملات تے بلوچستان تے خیبر پختونخوا وچ سکیورٹی دی صورتحال اُتے گل بات کیتی گئی۔ وزیراعظم نال چیئرمین قومی رحمت اللعالمین و خاتم النبیین اتھارٹی خورشید احمد ندیم نے وی ملاقات کیتی تے وزیراعظم نوں اتھارٹی دی سالانہ رپورٹ پیش کیتی۔ جدکہ مشہور دانشور، لکھاری تے کالم نگار ڈاکٹر فاروق عادل نے وی وزیراعظم نال ملاقات کر کے اپنا سفرنامہ “شاخِ زریں کے دائیں بائیں” پیش کیتا۔