“مریم نواز دا طلبہ لئی 1 لکھ لیپ ٹاپ، 50 ہزار سکالرشپ دا اعلان: 5 اضلاع وچ الیکٹرو بساں دا آغاز”

ساہیوال وچ 10 نواز شریف سکول آف ایمیننس دا افتتاح، سکولاں وچ سہولتاں لئی 40 ارب مختص

1 لکھ الیکٹرک بائیکس وی دیاں گے، تعلیم تے روزگار ریاست دی ذمہ داری اے: وزیراعلیٰ، عارفوالہ وچ خطاب

مریم نواز دا طلبہ لئی 1 لکھ لیپ ٹاپ، 50 ہزار سکالرشپ دا اعلان؛ 5 اضلاع وچ الیکٹرو بساں دا آغاز

لاہور (سٹاف رپورٹر)

وزیراعلیٰ مریم نواز شریف نے تحصیل عارف والا وچ ساہیوال ڈویژن لئی 10 ‘نواز شریف سکول آف ایمیننس’ دا افتتاح کردے ہوئے صوبے وچ تعلیمی، ٹرانسپورٹ، صحت، رہائش، زراعت تے فلاحی شعبیاں وچ کئی نویں منصوبیاں تے مراعات دا اعلان کیتا اے۔ اوہناں نے طلبہ نوں اک لکھ لیپ ٹاپ تے ہور 50 ہزار ہونہار سکالرشپس دین دے نال نال سرکاری سکولاں وچ بنیادی سہولتاں دی فراہمی لئی 40 ارب روپے، اک لکھ الیکٹرک بائیکس تے پنج سالاں وچ 5 ہزار الیکٹرک بساں چلاؤن دے منصوبے دا وی اعلان کیتا۔ افتتاحی تقریب نال خطاب کردے ہوئے وزیراعلیٰ نے آکھیا کہ پنجاب حکومت وسائل دی کمی نوں باصلاحیت طلبہ دی ترقی دے راہ وچ رکاوٹ نہیں بنن دیوے گی۔

صوبے وچ 300 ‘نواز شریف سکول آف ایمیننس’ قائم کیتے جا رہے نیں جتھے جدید کلاس رومز، مصنوعی ذہانت (AI) لیبز، کمپیوٹر لیبز، ایئرکنڈیشنڈ کلاساں تے اعلیٰ معیار دی پڑھائی دیاں سہولتاں دتیاں جان گئیاں۔ اوہناں دا کہنا سی کہ تعلیم ہی معاشرتی برابری تے ترقی دی ضمانت اے۔ وزیراعلیٰ نے سرکاری سکولاں وچ باتھ رومز، فرنیچر، کلاس رومز، کمپیوٹر لیبز، آئی ٹی، مصنوعی ذہانت تے STEAM لیبز دے قیام لئی 40 ارب روپے مختص کرن دا اعلان کردے ہوئے آکھیا کہ پنجاب دے طلبہ نوں اک لکھ لیپ ٹاپ، ہور 50 ہزار ہونہار سکالرشپس تے اک لکھ الیکٹرک بائیکس دتیاں جان گئیاں۔ کڑیاں توں الیکٹرک بائیک دی ڈاؤن پیمنٹ (پیشگی رقم) نہیں لئی جائے گی، جدکہ منڈیاں لئی صرف 15 ہزار روپے ڈاؤن پیمنٹ رکھی گئی اے۔

اوہناں آکھیا کہ پنجاب وچ 10 ہزار توں ودھ سرکاری سکول اپ گریڈ کیتے جا چکے نیں، جدکہ پنج لکھ توں ودھ نوجواناں نوں ہنر مندی دی تربیت دتی جا رہی اے۔ تربیت مکمل کرن والے نوجواناں نوں بیرون ملک روزگار لئی ‘پرواز کارڈ’ راہیں تن لکھ روپے تیکر مدد وی فراہم کیتی جا رہی اے۔ مریم نواز نے دسیا کہ جنوبی پنجاب دے 12 لکھ بچیاں نوں سکولاں وچ دودھ تے بسکٹ دتے جا رہے نیں، جس دے نتیجے وچ ہور 25 لکھ بچیاں دا داخلہ ممکن ہویا۔ پنجاب وچ طبقاتی فرق مکا کے معیاری تعلیم ہر بچے تیکر پہنچائی جا رہی اے۔

وزیراعلیٰ نے “اپنی چھت، اپنا گھر” پروگرام دے تحت دو لکھ گھراں دی تعمیر، بے زمین لوکاں نوں پلاٹاں دی الاٹمنٹ، “اپنی چھت، محفوظ چھت” سکیم دے تحت گھراں دی مرمت لئی پنج لکھ روپے تیکر بلا سود قرضہ، تے وڈے خانداناں لئی وادھو کمرے بناؤن لئی 10 لکھ روپے تیکر بلا سود قرضہ دین دا اعلان وی کیتا۔ اوہناں دے مطابق صوبے وچ تقریباً 40 ہزار کلومیٹر سڑکاں دی تعمیر تے بحالی مکمل ہو چکی اے، جدکہ لاہور وچ پاکستان دا پہلا سرکاری کینسر ہسپتال وی بن رہا اے۔

بعد وچ وزیراعلیٰ نے لیہ، اوکاڑہ، سیالکوٹ، چنیوٹ تے مری وچ الیکٹرک بس سروس دا وی ڈیجیٹل افتتاح کیتا۔ اوہناں آکھیا کہ اگست دے آخر تیکر پنجاب وچ 1100 الیکٹرک بساں سڑکاں اُتے آ جان گئیاں، جدکہ ایس مالی سال دوران ہور 1500 بساں شامل کیتیاں جان گئیاں۔ اوہناں دا کہنا سی کہ پنج سالاں وچ 5 ہزار الیکٹرک بساں چلاؤن دا ہدف اے، جس نال پنجاب وچ پاکستان دا سب توں وڈا تے ماحول دوست پبلک ٹرانسپورٹ نظام قائم ہووے گا۔