“2025-26 برآمدات وچ 5.93 فیصد کمی، وڈیاں صنعتاں دی پیداوار 5.77 فیصد ودھ گئی”

آٹو موبائل 58.82 فیصد، چینی 31.54، پیٹرولیم مصنوعات 15.75، گارمنٹس سیکٹر دی پیداوار وچ 7.05 فیصد اضافہ

آئرن اینڈ سٹیل، سیمنٹ، کھاد، ادویات، کیمیکلز تے ٹیکسٹائل دے ذیلی شعبیاں وچ منفی رجحان دیکھیا گیا: رپورٹ ادارہ شماریات

اسلام آباد (مدثر علی رانا)

سالانہ بنیاد اُتے وڈیاں صنعتاں دی پیداوار وچ 0.98 فیصد کمی ہوئی اے، جدکہ ماہانہ بنیاد اُتے اپریل دے مقابلے وچ مئی دوران پیداوار وچ 1.21 فیصد اضافہ ہویا اے۔ دوجے پاسے مالی سال 2025-26 دے پہلے گیارہ مہینیاں (جولائی توں مئی تیکر) دی مجموعی پیداوار وچ 5.77 فیصد اضافہ ریکارڈ کیتا گیا اے۔ ادارہ شماریات دی جاری کردہ رپورٹ دے مطابق آٹو موبائل سیکٹر دی کارکردگی سب توں ودھیا رہی، جس دی مئی 2026 وچ پیداوار 20.81 فیصد رہی، جدکہ گیارہ مہینیاں دی مجموعی پیداوار وچ 58.82 فیصد دا وڈا اضافہ ریکارڈ کیتا گیا۔ چینی دی پیداوار وچ وی نمایاں بہتری دیکھی گئی، مئی وچ چینی دی پیداوار 23.25 فیصد تے جولائی توں مئی تیکر مجموعی طور اُتے 31.54 فیصد بڑھی۔

مئی وچ پیٹرولیم مصنوعات دی پیداوار 15.75 فیصد ودھی، جدکہ گارمنٹس سیکٹر دی پیداوار وچ 7.05 فیصد اضافہ ہویا۔ کجھ شعبیاں وچ منفی رجحان وی دیکھیا گیا، آئرن اینڈ سٹیل دی پیداوار مئی وچ 12.57 فیصد تے سیمنٹ دی پیداوار 9.36 فیصد گھٹ رہی، جدکہ کھاد دی پیداوار وچ 4.77 فیصد کمی ہوئی۔ ادویات، کیمیکلز تے ٹیکسٹائل دے کجھ ذیلی شعبیاں دی پیداوار وچ وی کمی ریکارڈ کیتی گئی۔

اک دوجی رپورٹ دے مطابق، جون وچ برآمدات، خاص طور اُتے ٹیکسٹائل برآمدات وچ نمایاں کمی دیکھی گئی۔ جون وچ ٹیکسٹائل برآمدات سالانہ بنیاد اُتے 16.71 فیصد گھٹ ہو کے 1 ارب 267 ملین ڈالر رہیاں، جدکہ جون 2025 وچ ایہ حجم 1 ارب 521 ملین ڈالر سی۔ جون 2026 وچ مجموعی برآمدات 2 ارب 252 ملین ڈالر رہیاں، جو مئی 2026 دے 2 ارب 689 ملین ڈالر توں 16.25 فیصد گھٹ نیں۔

جون دوران تجارتی خسارہ 4 ارب 679 ملین ڈالر ریکارڈ کیتا گیا، سال 2025-26 وچ مجموعی برآمدات 30 ارب 139 ملین ڈالر رہیاں، جو پچھلے مالی سال دے 32 ارب 40 ملین ڈالر توں 5.93 فیصد گھٹ نیں۔ اس عرصے وچ درآمدات 8.14 فیصد اضافے نال 69 ارب 761 ملین ڈالر تیکر پہنچ گئیاں، جس نال مجموعی تجارتی خسارہ ودھ کے 39 ارب 622 ملین ڈالر ریکارڈ کیتا گیا۔ مالی سال دوران ٹیکسٹائل برآمدات وچ معمولی بہتری دیکھی گئی، ادارہ شماریات دے مطابق جولائی توں جون 2025-26 تیکر ٹیکسٹائل برآمدات 0.26 فیصد اضافے نال 17 ارب 930 ملین ڈالر رہیاں، جو پچھلے مالی سال 17 ارب 880 ملین ڈالر سن۔ ریڈی میڈ گارمنٹس دی برآمدات 3.87 فیصد اضافے نال 4 ارب 288 ملین ڈالر، کاٹن یارن دی برآمدات 12.40 فیصد اضافے نال 765 ملین ڈالر، تے ہور ٹیکسٹائل مصنوعات دی برآمدات 8.67 فیصد اضافے نال 790.86 ملین ڈالر ریکارڈ کیتیاں گئیاں۔