بنوں تے آلے دوالے وچ فورسز دیاں کاروائیاں، بھارتی پراکسی فتنہ الخوارج دے 24 دہشتگرد ہلاک۔

بنوں تے آلے دوالے وچ فورسز دیاں کاروائیاں، بھارتی پراکسی فتنہ الخوارج دے 24 دہشتگرد ہلاک (فائل فوٹو)

راولپنڈی: سکیورٹی فورسز نے بنوں تے آلے دوالے وچ کاروائیاں دے دوران بھارتی پراکسی فتنہ الخوارج دے 24 خوارج نوں ہلاک کر دتا اے۔

پاک فوج دے شعبہ تعلقات عامہ (آئی ایس پی آر) دے مطابق 24 گھنٹیاں وچ بنوں تے آلے دوالے وچ فائرنگ دے تبادلیاں وچ بھارتی پراکسی فتنہ الخوارج دے 24 خوارج ہلاک ہوئے نیں، جنہاں دے قبضے چوں اسلحہ تے گولہ بارود وی برآمد کیتا گیا اے۔

آئی ایس پی آر نے دسیا کہ ایہہ خوارج کئی دہشتگرد کاروائیاں تے بے گناہ شہریاں دے قتل وچ ملوث سن۔

آئی ایس پی آر دے مطابق بنوں وچ حالیہ دہشتگرد کاروائیاں تے خودکش دھماکے توں بعد سکیورٹی فورسز دے آپریشنز جاری نیں، دہشتگرداں تے اوہناں دے سہولت کاراں دے خلاف سانجھے انٹیلی جنس بیسڈ آپریشنز شروع کر دتے گئے نیں، دہشتگردی دے خلاف جاری کاروائیاں پوری طاقت نال جاری رہن گیاں۔