پی آئی اے لئی 16 نویں جہازاں دی خریداری وچ پیشرفت
وفاقی وزیر داخلہ محسن نقوی دا واشنگٹن وچ بوئنگ کمپنی دے ہیڈکوارٹرز دا دورہ
وکھو وکھرے آپشنز اُتے تفصیلی گل بات، بہترین ڈیل نوں جلد آخری شکل دین اُتے اتفاق
واشنگٹن، اسلام آباد
وفاقی وزیر داخلہ محسن نقوی نے واشنگٹن وچ بوئنگ کمپنی دے ہیڈکوارٹرز دا دورہ کیتا، جتھے اوہناں نے بوئنگ گلوبل دے صدر برینڈن نیلسن نال ملاقات کیتی۔ ایس موقعے اُتے پی آئی اے دی نویں انتظامیہ دا وفد وی اوہناں دے نال سی۔ ملاقات وچ قومی ہوائی کمپنی (پی آئی اے) لئی 16 نویں جہازاں دی خریداری دے بارے وچ اہم پیش رفت ہوئی۔ دونویں دھریاں نے وکھو وکھرے آپشنز اُتے تفصیلی گل بات کیتی تے بہترین ڈیل نوں چھیتی توں چھیتی آخری شکل دین اُتے اتفاق کیتا۔
وفاقی وزیر داخلہ محسن نقوی نے پی آئی اے لئی نویں جہازاں دی چھیتی خریداری وچ تعاون دا یقین دوان اُتے بوئنگ گلوبل دے صدر دا شکریہ ادا کیتا۔ اوہناں نے دنیا وچ جہاز بناؤن دی صنعت وچ بوئنگ کمپنی دے اہم کردار دی تعریف کردے ہوئے امید جتائی کہ ایہ تعاون قومی ایئرلائن دے بیڑے (فلیٹ) نوں نویں دور دے مطابق ودھاؤن وچ وڈا کردار ادا کرے گا۔
