کشمیر امن جرگے دا موجودہ بحران اُتے قومی فیکٹ فائنڈنگ مشن دا مطالبہ
اداریاں تے ایکشن کمیٹی وچکار مذاکرات اُتے اطمینان، شفاف الیکشن کروان اُتے زور
معاہدیاں اُتے چھیتی عمل کیتا جائے: اعلامیہ؛ ساریاں دھریاں حوصلے دا مظاہرہ کرن: لیاقت بلوچ
اسلام آباد (اپنے رپورٹر توں)
جماعت اسلامی دے نائب امیر لیاقت بلوچ دی سربراہی وچ ہون والے کشمیر امن جرگے نے حکومت تے کالعدم جوائنٹ عوامی ایکشن کمیٹی دے وچکار طے پائے معاملیاں اُتے چھیتی عملدرآمد کرن، آزاد کشمیر دی موجودہ حالت دے جائزے لئی اک غیر جانبدار قومی فیکٹ فائنڈنگ مشن بناؤن تے 27 جولائی نوں آزاد کشمیر وچ ہون والے چناؤ (انتخابات) نوں آزاد، منصفانہ تے شفاف بناؤن دا مطالبہ کیتا اے۔
اسلام آباد وچ ہون والے جرگے نے جوائنٹ عوامی ایکشن کمیٹی ولوں لانگ مارچ اگیہاں پان (ملتوی کرن) دے فیصلے نوں جی آیاں نوں آکھیا اے تے اداریاں تے ایکشن کمیٹی وچکار گل بات دی خبراں اُتے تسلی دا اظہار کیتا اے۔ جرگے دے شریکاں نے حکومت اُتے زور دتا کہ موجودہ بحران دا حل طاقت ورتن دی بجائے گل بات، سیاسی تدبر تے لوکاں دا بھروسہ بحال کرن وچ اے۔ امن جرگے دے بلاریاں تے اہم شریکاں وچ میاں محمد اسلم، عبدالرشید ترابی، ڈاکٹر خالد محمود، راجہ جہانگیر خان، شکیل احمد ترابی، علامہ امتیاز احمد صدیقی، حریت رہنما جاوید مقبول بٹ، بریگیڈیئر (ر) الطاف، سابق بیوروکریٹ محمد سلیم بسمل، اوورسیز کشمیری رہنما سردار ذوالفقار روشن، تنویر احمد خان، پیر ڈاکٹر سلطان العارفین تے تاجر رہنما مسعود رضا شامل سن۔
اجلاس دے ختم ہون اُتے سانجھا اعلامیہ وی جاری کیتا گیا۔ اجلاس توں بعد میڈیا نال گل بات کردے ہوئے لیاقت بلوچ نے آکھیا کہ جرگہ قومی قیادت، آزاد کشمیر دی قیادت تے ریاستی اداریاں نال لگاتار رابطے وچ اے تے ساریاں کوششاں دا مقصد گل بات راہیں مسئلے دا حل کڈھنا اے، جوائنٹ ایکشن کمیٹی تے مقتدر اداریاں وچکار مذاکرات دیاں خبراں حوصلہ ودھاؤن والیاں نیں، ساریاں دھریاں حوصلے، بردباری تے گل بات دا راہ چُنن۔ اعلامیے وچ آکھیا گیا کہ طے شدہ معاہدیاں اُتے چھیتی تے مکمل عمل کیتا جائے، حکومتِ پاکستان، حکومتِ آزاد کشمیر، ریاستی اداریاں، سیاسی جماعتاں تے سول سوسائٹی اُتے زور دتا گیا کہ اوہ گل بات راہیں بحران دے حل نوں یقینی بناؤن۔
