جانوں مارن دیاں دھمکیاں، عامر خان نے اپنی تیجی گھر والی دا مذہب دس دتا۔
بالی وڈ اداکار عامر خان نے جانوں مارن دیاں دھمکیاں ملن توں بعد اپنی تیجی گھر والی دے مذہب بارے وڈا انکشاف کیتا اے۔
بھارتی میڈیا دے مطابق ریاست مہاراشٹرا دے اک وزیر نتیش رانے ولوں عامر خان دیاں شادیاں دے حوالے نال اوہناں نوں ’لو جہاد دا برانڈ ایمبیسیڈر‘ آکھیا گیا سی۔
ایودھیا دے اک ہندو انتہا پسند آگو جگد گرو پرمہنس آچاریہ نے لوکاں دے سامنے وزیر نتیش رانے دے بیان دی حمایت کیتی تے دعویٰ کیتا کہ عامر خان دی ہندو عورتاں نال شادی دا مقصد لو جہاد نوں ودھاوا دینا سی، ایہ گل صرف الزام نہیں بلکہ سچائی اے۔
ایہدے نال ہی ہندو انتہا پسند آگو نے عامر خان نوں قتل کرن والے بندے لئی 5 کروڑ روپے انعام دا اعلان کیتا تے قتل کرن والے بندے دے قانونی خرچے چکن دی یقین دہانی وی کروائی۔
میڈیا خبراں وچ دسیا گیا اے کہ جانوں مارن دیاں دھمکیاں توں بعد عامر خان نے حال ہی وچ دتے گئے اک انٹرویو وچ اپنی تیجی بیوی دے مذہب بارے گل کیتی تے دسیا کہ اوہناں دی تیجی بیوی گوری اسپرٹ ہندو نہیں بلکہ عیسائی خاتون نیں۔
اداکار نے ہور آکھیا کہ میری پہلی گھر والی رینا تے دوجی گھر والی کرن نے وی شادی توں بعد اپنا مذہب نہیں بدلیا سی، تے ہن گوری نے وی ایسا نہیں کیتا کیونکہ اسیں ‘سول میرجز’ (civil marriages) کیتیاں سن۔
عامر خان دا کہنا سی کہ سچ تے ایہ اے کہ ساڈا ٹبر سب نوں نال لے کے چلن والا ٹبر اے، میریاں دونواں بھیناں دی شادی ہندو نال ہوئی جدکہ میرے کزن منصور نے اک عیسائی خاتون نال شادی کیتی تے میری دھی نے وی اک ہندو بندے نال شادی کیتی اے۔
واضح رہے کہ عامر خان نے اپنی پہلی گھر والی رینا دتہ نال 1986 وچ شادی کیتی سی جو 2002 وچ ختم ہو گئی، جدکہ دوجی گھر والی کرن راؤ نال 2005 وچ شادی ہوئی جو 2021 وچ ختم ہوئی۔
اداکار نے تیجی شادی گوری اسپرٹ نال کیتی اے۔
