کیو آر کوڈ راہیں بناں کسے فیس دے 10 واری ای-سم منتقل کرن دا نظام تیار کر لیا: پی ٹی اے

صارف دوست پالیسی، فائیو جی خضمتاں نوں بہتر بنان دی ہدایت، سی ایس ایس کوٹے دا جائزہ

اسلام آباد (سید قیصر شاہ)

سینیٹ دی قائمہ کمیٹی برائے کابینہ سیکرٹریٹ دا اجلاس سینیٹر رانا محمود الحسن دی صدارت ہیٹھ ہویا، جس وچ ای-سم دی منتقلی، فائیو جی سروس، موبائل نیٹ ورک، شاہراہواں (سڑکاں) اُتے کوریج، بائیومیٹرک تصدیق دے متبادل نظام تے سی ایس ایس کوٹے نال جڑے معاملیاں دا جائزہ لیا گیا۔ پی ٹی اے نے دسا کہ وکھو وکھریاں کمپنیاں دیاں وکھریاں پالیسیاں نوں ختم کرن لئی اکو جیہا (یکساں) نظام تیار کیتا جا رہا اے، جس دے تحت صارفین کیو آر کوڈ راہیں بناں کسے فیس دے 10 واری ای-سم اک ڈیوائس توں دوجی وچ منتقل کر سکن گے۔

کمیٹی نے ٹیلی کام دے شعبے وچ انضمام (کمپنیاں دے اکٹھیاں ہون) نال مسابقت متاثر ہون اُتے تشویش دا اظہار کردے ہوئے پی ٹی اے نوں گاہک دوست (صارف دوست) پالیسی یقینی بنان دی ہدایت کیتی۔ پی ٹی اے دے مطابق ملک وچ 499 فائیو جی سائٹس لگ چکیاں نیں تے ایس سال دے اخیر تیکر وڈے شہراں وچ نمایاں کوریج ملنا شروع ہو جائے گی، تقریباً 1 کروڑ 56 لکھ فائیو جی نال چلیڑ والے موبائل فون ورتوں وچ نیں۔

کمیٹی نوں دسا گیا کہ پچھلے دو سالاں وچ سروس دے معیار دی خلاف ورزی اُتے ٹیلی کام کمپنیاں نوں مجموعی طور اُتے 4 ارب 30 کروڑ روپے جرمانے کیتے گئے۔ شاہراہواں تے پسماندہ علاقیاں وچ کوریج بہتر بنان، مکران کوسٹل ہائی وے اُتے نیشنل رومنگ، موٹرویز اُتے وی ایسے نظام نوں لاگو کرن تے جنہاں علاقیاں وچ سروس نہیں اوتھے سیٹلائٹ ٹیکنالوجی ورتن اُتے وی بریفنگ دتی گئی۔

بائیومیٹرک تصدیق فیل ہون دی صورت وچ اکھاں دے سکین (ریٹینا سکین) تے چہرے دی پچھان (فیس ریکگنیشن) ورگے متبادل طریقے متعارف کروان دی وی ہدایت کیتی گئی۔ اوگرا نوں سمارٹ گیس میٹرنگ نوں ودھان تے صارفین دے بچاؤ لئی اقدامات تیز کرن دی ہدایت وی دتی گئی۔

اجلاس وچ سینیٹر سلیم مانڈوی والا، سینیٹر سعدیہ عباسی، سینیٹر عامر ولی الدین چشتی، کابینہ ڈویژن، پی ٹی اے، اوگرا، اسٹیبلشمنٹ ڈویژن، ٹیلی کام کمپنیاں تے ہور متعلقہ اداریاں دے اعلیٰ افسراں نے شرکت کیتی۔ کمیٹی نے پرانیاں سفارشاں اُتے عمل دا جائزہ لیندے ہوئے اوگرا توں بریفنگ لئی۔ اوگرا نے دسا کہ گیس لیکیج دے شک اُتے گیس میٹر لاہن دا مسئلہ حل کر لیا گیا اے۔ چیئرمین کمیٹی نے ایس این جی پی ایل وچ انتظامی خامیاں نوں دور کرن دی وی ہدایت کیتی۔