یورپی یونین جی ایس پی پلس سکیم پاکستان سب توں ودھ فائدہ چکن والا ملک قرار

فائدے دی شرح 95.1 فیصد، 2024 وچ 7.5 ارب یورو دیاں برآمدات، 732 ملین یورو ٹیرف دی بچت

پاکستان لئی 400 ملین یورو دے ترقیاتی تے اصلاحاتی تعاون دا عزم، 27 بین الاقوامی کنونشنز دی توثیق برقرار: رپورٹ

اسلام آباد (دنیا رپورٹ)

یورپی کمیشن دی تازہ جی ایس پی پلس رپورٹ وچ پاکستان نوں بدستور ایس سکیم توں سب توں ودھ فائدہ چکن والا ملک قرار دے دتا گیا اے، جدکہ یورپی یونین نے پاکستان لئی 400 ملین یورو دے ترقیاتی تے اصلاحاتی تعاون دے عزم نوں وی دہرایا اے۔

رپورٹ دے مطابق، 2024 دے دوران پاکستان دیاں 7.5 ارب یورو مالیت دیاں برآمدات (ایکسپورٹ) جی ایس پی پلس دیاں تجارتی رعایتوں توں مستفید ہوئیاں، جس دے نتیجے وچ پاکستان نوں تقریباً 732 ملین یورو دی ٹیرف (ٹیکس) بچت ہوئی۔ پاکستان نے جی ایس پی پلس توں فائدے دی شرح 95.1 فیصد تیکر پہنچا دتی اے، جدکہ 2024 وچ یورپی یونین نے پاکستان دیاں مجموعی برآمدات دا 28 فیصد حصہ اپنے ملک منگوایا (درآمد کیتا)۔

رپورٹ وچ دسیا گیا اے کہ پاکستانی ملبوسات (کپڑے)، ٹیکسٹائل، چمڑے، تیار خوراک تے دوجیاں برآمدی چیزاں نے جی ایس پی پلس دیاں چھوٹاں توں تگڑا فائدہ اٹھایا۔ پاکستان نے جی ایس پی پلس نال جڑے سارے 27 بین الاقوامی کنونشنز دی توثیق نوں برقرار رکھیا اے تے یورپی یونین دے مانیٹرنگ عمل نال لگاتار تعاون جاری رکھیا اے۔

یورپی کمیشن نے قومی کمیشن برائے انسانی حقوق (NCHR) نوں عالمی ‘اے سٹیٹس’ ملن نوں اک وڈی ادارہ جاتی ترقی قرار دتا، جدکہ قومی کمیشن برائے اقلیت دے قیام لئی قانون سازی نوں گھٹ گنتیاں (اقلیتوں) دے بچاؤ لئی اک چنگا قدم آکھیا۔ رپورٹ وچ تشدد دے خلاف قانون دے عملی اصولاں، ٹریننگ دے کماں، جیل سدھاراں، عورتاں دے تحفظ، گھریلو تشدد نوں روکن، نکی عمر دی شادی دے خلاف قانون سازی، مزدوراں دے حقاں، جبری مشقت تے بچیاں توں مزدوری کروان دے خاتمے لئی کیتے گئے قدماں دی وی تعریف کیتی گئی۔

یورپی کمیشن نے پاکستان دی موسماتی پالیسی (کلائمیٹ پالیسی)، کاربن مارکیٹ دے اصولاں، جنگلی حیات تے قدرتی ماحول دے بچاؤ، نشے دے خلاف نویں قوانین تے ڈیجیٹل کیس مینجمنٹ سسٹم نوں وی مثبت پیش رفت قرار دتا تے آکھیا کہ یورپی یونین پاکستان نال ترقیاتی تے اصلاحاتی سانجھ لئی 400 ملین یورو دین دے عزم اُتے قائم اے۔