ایران امریکا تعلقات ن بحالی وچ پاکستان ہی مددگار بن سکدا اے
غیر جانبدار سفارتی رویہ رکھن تے اعتماد قائم کرن اُتے ہی کامیابی دا دارومدار اے
لاہور
امریکہ تے ایران دے وچکار ودھدی ہوئی کھچو تان (کشیدگی) نے عالمی تے علاقائی امن لئی خطرے دی گھنٹی وجا دتی اے، جس پاروں ہر پاسے چنتا (تشویش) دی لہر محسوس کیتی جا رہی اے۔ کیہ خطے دے ملک ایس جنگ دے اثرات توں بچ سکن گے؟ فی الحال تے ایسا ہوندیا نظر نہیں آ رہا۔ امریکہ ولوں ایران اُتے حملیاں نے مشرقِ وسطیٰ تے خلیج فارس وچ بہت خطرناک حالات پیدا کر دتے نیں تے ایم او یو (مفاہمتی یادداشت) سچی مچی ختم ہوندی نظر آ رہی اے۔ جے امریکہ نے ایران خلاف کارروائیاں نوں ہور ودھایا تے زمینی فوجاں واڑ دتیاں، تاں پھر ایہ جنگ صرف خلیج فارس تیکر محدود نہیں رہے گی۔ پاکستان دوجے دوست ملکاں نال رابطے کر کے ایس صورتحال تے ایہدے ماڑے نتیجے توں بچن لئی اک واری پھر کوششاں کر رہا اے، تے دوست ملکاں دی صلاح نال وچولے (ثالثی) دا عمل فیر شروع کیتا گیا اے۔
جے کہ مفاہمتی یادداشت ختم ہو چکی اے، پر پاکستان دی سفارتی کوششاں دا جواز مک نہیں گیا، بلکہ جے ایہ آکھیا جائے تاں غلط نہیں ہوئے گا کہ معاہدہ ٹٹن توں بعد پاکستان دا کردار ہور اہم ہو گیا اے۔ پاکستان ہن معاہدہ کروان دی بجائے تباہی نوں روکن تے بھوکھ (مستقبل) دے بوہے کھلے رکھن لئی اپنی واہ لا رہا اے۔ اجکل دے حالات وچ فوراً جنگ بندی دی امید تے نظر نہیں آؤندی، پر حالات بدل رہے نیں۔ ساہمنیں نظر آ رہا اے کہ صدر ٹرمپ بار بار وعدہ خلافی کر رہے نیں۔ پہلے اوہناں نے گلاں باتاں دے دوران ایران دیاں جوہری تنصیبات اُتے حملہ کیتا، تے پھر 28 فروری نوں امریکہ تے اسرائیل نے ایران اُتے حملہ کیتا جیہنوں ایران بھلن لئی تیار نہیں۔ ایس حملے وچ ایران دے رہبر آیت اللہ علی خامنہ ای شہید ہوئے سن، تے پھر پاکستان سنے دوجے ملکاں نے رل کے امریکہ تے ایران وچکار اک مفاہمتی معاہدہ کروایا سی۔ ایس معاہدے اُتے عمل لئی 60 دناں دا شیڈول بنایا گیا سی، پر اجے مہینہ وی نہیں لنگھیا سی کہ ٹرمپ نے دوبارہ ایران اُتے حملہ کر دتا تے ہور سخت حملیاں دی دھمکی دتی۔ پچھلے اک ہفتے توں امریکی حملیاں پاروں ایران دا جانی تے مالی نقصان ہویا اے، پر اوہناں حملیاں نے خود امریکہ نوں ننگا کر دتا اے تے ثابت کیتا اے کہ صدر ٹرمپ دے وعدیاں اُتے یقین نہیں کیتا جا سکدا۔
