غلط فیصلیاں نال ملکی معیشت تباہی دے دہانے تے اپڑ چکی: احسن اقبال

اسلام آباد: احسن اقبال آکھیا اے غلط فیصلیاں نال ملکی معیشت تباہی دے دہانے تے اپڑ چکی، دو ورھے توں جی ڈی پی گروتھ مسلسل تھلے، ایٹمی ملکاں دے لوک وینٹی لیٹرز نہ ہون تے مر رہے نیں جہڑے گھر دا سربراہ کہوے ملک دیوالیہ ہو چکیا اوہدا ساتھ کون دیوے گا؟ مسلم لیگ (ن) دے رہنما احسن اقبال نے قومی اسمبلی وچ اظہار خیال کردیاں آکھیا اج چھوٹے توں چھوٹا کاروبار کرن والا پیشیاں بھگت رہیا اے، احتساب دے ادارے دا مقصد صرف اپوزیشن نوں ہراساں کرنا اے، سی پیک بہترین تحفہ اے جہڑا صدیاں وچ اک وار ملدا اے، نہیں پتہ معیشت بحالی لئی آن والی حکومت نوں کناں ویلا لگے گا، اسیں معیشت نوں پنج ورھے وچ سنبھالیا، اوہناں نے 2سال وچ فریکچر کر دتا۔ احسن اقبال دا کہنا سی ساڈے دور وچ کئی ملکاں نے سرمایہ کاری وچ دلچسپی ظاہر کیتی، بجٹ دا حجم ویکھ کے دسو ، کس قسم دی معیشت اے، ٹیکس ریونیو تے گروتھ ریٹ تے حکومتی کارکردگی توں مطمئن نہیں، تسیں موجودہ اخراجات کنٹرول نہیں کر سکدے، تسیں ہر خالی تھاں قرض لے کے پوری کر رہے او۔ لیگی رہنما ہور آکھیا اسیں 5ورھیاں وچ 10ارب قرض لیا، بجلی دے منصوبے لائے، موٹروے بنایا، بجٹ وچ پیش کیتا گیا ٹیکس ریونیو دا ہدف حکومت حاصل نہیں کر سکدی، اسیں تباہی ول جا رہے آں، کوئی نیب ، کوئی ایف آئی اے دی پیشیاں بھگت رہیا اے۔