حکومت ہر دیہاڑے عوام دی جیب اُتے ڈاکہ مارن دی بجائے پٹرولیم لیوی مکائے: حافظ نعیم
حکومت پٹرول اُتے 120 روپے ٹیکساں دا خاتمہ کیوں نہیں کردی جیہدا پٹرول دی اصل قیمت نال کوئی تعلق نہیں
ناکام حکومت ناکامیاں دا بوجھ مسلسل مہنگائی، نویں ٹیکساں دی صورت وچ عوام اُتے منتقل کر رہی اے: امیر جماعت اسلامی
لاہور (مانیٹرنگ ڈیسک)
امیر جماعت اسلامی پاکستان حافظ نعیم الرحمن نے پٹرولیم مصنوعات دیاں قیمتاں وچ اضافے دے حکومتی فیصلے نوں شدید تنقید دا نشانہ بناؤندیاں ہویاں آکھیا اے کہ حکومت نے عوام دیاں جیباں اُتے ہر دیہاڑے ڈاکہ مارن دا فیصلہ کر لیا اے، حکومت عوام دیاں جیباں اُتے ڈاکہ مارن دی بجائے پٹرولیم مصنوعات اُتے لیوی مکائے۔
سماجی رابطے دی ویب سائٹ ‘ایکس’ اُتے اپنے ردعمل وچ حافظ نعیم الرحمن نے آکھیا کہ روز دی بنیاد اُتے پٹرول دیاں قیمتاں وچ اضافے دا مطلب ایہ اے کہ حکمراناں نے عوام نوں روز لوٹن دا فیصلہ کیتا اے۔ اوہناں نے سوال چکیا کہ اتحادی حکومت پٹرولیم مصنوعات دیاں قیمتاں وچ مسلسل اضافے دی بجائے پٹرول اُتے عائد 120 روپے فی لیٹر ٹیکساں دا خاتمہ کیوں نہیں کردی، جیہناں دا پٹرول دی اصل قیمت نال کوئی تعلق نہیں۔
امیر جماعت اسلامی نے آکھیا کہ حکومت لیوی دے ناں اُتے عوام توں بھتہ وصول کرنا کیوں بند نہیں کردی؟ ناکام حکومت اپنی معاشی ناکامیاں دا بوجھ مسلسل مہنگائی تے نویں ٹیکساں دی صورت وچ عوام اُتے منتقل کر رہی اے۔ حکومت عوام اُتے ہور مالی بوجھ پاؤن دی بجائے پٹرولیم مصنوعات اُتے عائد غیر ضروری ٹیکس تے لیوی ختم کرے تاکہ مہنگائی توں پریشان عوام نوں سچی مچی دا ریلیف مل سکے۔
