پاک چین امیگریشن تے بارڈر مینجمنٹ دا سانجھا (مشترکہ) ورکنگ گروپ بناؤن دا فیصلہ
حکومت غیر قانونی امیگریشن دے خلاف زیرو ٹالرنس پالیسی اُتے عمل پیرا اے: محسن نقوی
چین پاکستانی اداروں دی کم کرن دی سکت (استعداد کار) ودھاؤن وچ تعاون جاری رکھے گا: چی جنگ یانگ
اسلام آباد (اے پی پی)
وفاقی وزیر داخلہ محسن نقوی تے وزیر مملکت طلال چودھری نال چین دی نیشنل امیگریشن ایڈمنسٹریشن دے ڈائریکٹر جنرل چی جنگ یانگ دی اگوائی وچ اک اچے پدھر (اعلیٰ سطح) دے وفد نے ملاقات کیتی، جیہدے وچ دوہاں ملکاں دے وچالے امیگریشن، بارڈر مینجمنٹ تے ادارہ جاتی تعاون نوں ہور ودھاؤن اُتے اتفاق کیتا گیا۔ ملاقات دوران غیر قانونی امیگریشن، اسلحے دی سمگلنگ تے سرحد پار جرائم دے خلاف سانجھی کارروائیاں نوں اثر دار بناؤن دا فیصلہ کیتا گیا، جد کہ امیگریشن دے عمل نوں تیز کرن لئی اک معاہدے نوں چھیتی آخری روپ دِتا جائے گا۔ ایس موقعے اُتے بارڈر مینجمنٹ تے سکیورٹی دی نگرانی لئی اک پاک چین سانجھا (مشترکہ) ورکنگ گروپ بنان اُتے وی اتفاق ہویا۔
وزیر داخلہ محسن نقوی نے گل بات کردیاں آکھیا کہ لینڈ بارڈر، سی پورٹس تے امیگریشن مینجمنٹ وچ چین نال تعاون ودھایا جائے گا۔ اوہناں نے صاف آکھیا کہ حکومتِ پاکستان غیر قانونی امیگریشن تے سمگلنگ دے خلاف زیرو ٹالرنس پالیسی اُتے عمل کر رہی اے تے ایہناں جرائم وچ ملوث بندیاں دے خلاف بنا کسے فرق دے کارروائی کیتی جا رہی اے۔
چینی وفد دے سربراہ چی جنگ یانگ نے آکھیا کہ چین تے پاکستان سٹریٹجک شراکت دار نیں تے چین پاکستانی اداروں دی کم کرن دی سکت (استعداد کار) ودھاؤن لئی اپنا تعاون جاری رکھے گا۔
