بلوچستان ہائیکورٹ دے جج لئی ایڈووکیٹ سلیم لاشاری دی نامزدگی اُتے اعتراضات

بلوچستان ہائیکورٹ لئی جج دے امیدوار ایڈووکیٹ سلیم لاشاری دی نامزدگی اُتے اعتراضات سامنے آ گئے

سلیم لاشاری نے سرکاری نوکری دے دوران جعل سازی نال وکالت دا لائسنس لیا، وائس چیئرمین بلوچستان بار کونسل جاڈین دشتی دا دعویٰ

اسلام آباد (کورٹ رپورٹر)

بلوچستان ہائیکورٹ لئی جج دے امیدوار ایڈووکیٹ سلیم لاشاری دی نامزدگی اُتے اعتراضات سامنے آ گئے نیں۔ بلوچستان بار کونسل دے وائس چیئرمین جاڈین دشتی نے ایڈووکیٹ سلیم لاشاری دے خلاف وکھو وکھ شکایتاں جوڈیشل کمیشن وچ جمع کروا دتیاں نیں۔ جاڈین دشتی دے مطابق ایہ شکایتاں پاکستان بار کونسل، چیف جسٹس سپریم کورٹ، چیف جسٹس وفاقی آئینی عدالت تے جوڈیشل کمیشن دے دوجے ارکان نوں بھیج دتیاں گئیاں نیں۔

وائس چیئرمین بلوچستان بار کونسل نے مؤقف اپنایا کہ ایڈووکیٹ سلیم لاشاری نوں بلوچستان ہائیکورٹ دا جج نامزد کیتے جان اُتے اوہناں نوں اعتراض اے۔ اوہناں دا کہنا سی کہ سلیم لاشاری نے سرکاری ملازمت دے دوران وکالت دا لائسنس لیا جیہڑا قاعدے قانون دے الٹ اے۔ سلیم لاشاری نے جعل سازی دے ذریعے وکالت دا لائسنس حاصل کیتا، ایسے لائسنس دی بنیاد اُتے اوہناں نوں ہائیکورٹ دے جج دے امیدوار لئی نامزد نہیں کیتا جا سکدا۔

اوہناں نے ہور دعویٰ کیتا کہ ایڈووکیٹ سلیم لاشاری دی نامزدگی میرٹ اُتے نہیں ہوئی۔ اوہناں نے جوڈیشل کمیشن توں منگ کیتی کہ اوہناں دے خلاف لائے گئے اعتراضات تے شکایتاں دا جائزہ لے کے ڈھکواں فیصلہ کیتا جائے۔ ایس معاملے اُتے ایڈووکیٹ سلیم لاشاری دا مؤقف ہلے تیکر سامنے نہیں آیا۔