وفاقی آئینی عدالت اپنی ذمہ داریاں پوریاں کردی رہے گی، چیف جسٹس
آئین ہر شہری نوں برابر دے حق، مذہبی آزادی تے انصاف تیکر پہنچ دی ضمانت دیندا اے: جسٹس امین الدین خان
انصاف تے قانون دی حکمرانی لئی کوششاں جاری رکھاں گے، چیف جسٹس وفاقی آئینی عدالت
اسلام آباد (کورٹ رپورٹر)
چیف جسٹس وفاقی آئینی عدالت جسٹس امین الدین خان نے آکھیا اے کہ آئینِ پاکستان ہر شہری نوں مذہب، عقیدے یا پس منظر توں اتے اٹھ کے برابر دے حق، مذہبی آزادی تے انصاف تیکر اکو جہی پہنچ دی ضمانت دیندا اے۔ وفاقی آئینی عدالت آئین دی بالادستی تے بنیادی حقوق دے تحفظ و نفاذ لئی اپنی آئینی ذمہ داریاں پوریاں کردی رہے گی۔
جاری کیتے گئے اعلامیے دے مطابق اوہناں نے ایہناں خیالاں دا اظہار بین الاقوامی یومِ انصاف (انصاف دے عالمی دیہاڑے) دے موقعے اُتے پاکستان دی مذہبی اقلیتی برادریاں دے 13 رکنی وفد نال ملاقات دوران کیتا، جس نے وفاقی آئینی عدالتِ پاکستان دا دورہ کیتا۔ ملاقات وچ جسٹس باقر علی نجفی تے رجسٹرار محمد حفیظ اللہ خان وی موجود سن۔ آئی ایم آر ایف دی درخواست اُتے ہون والے ایس دورے وچ مسٹر سیموئیل پیارا دی اگوائی وچ مسیحی، سکھ، ہندو، سنتن دھرم، بہائی تے کیلاش برادریاں دے نمائندے شامل سن۔
ملاقات دوران آئینی اداروں دے کردار، اقلیتاں دے حقوق دے تحفظ، بین المذاہب ہم آہنگی نوں ودھاؤن تے قانون دی حکمرانی اُتے لوکاں دے بھروسے نوں ہور مضبوط کرن دے حوالے نال تفصیلی گل بات کیتی گئی۔ وفد دے ارکان نے عدلیہ اُتے اپنے اعتماد دا اظہار کردیاں ہویاں آئینی حقوق دے تحفظ وچ وفاقی آئینی عدالت دے کردار نوں سلاہیا۔ اوہناں نے آکھیا کہ بین الاقوامی یومِ انصاف دے موقعے اُتے ایس طرحاں دی تعمیری گل بات قومی یکجہتی، باہمی احترام تے شمولیت نوں ودھاؤن وچ اہم کردار ادا کرے گی۔
ملاقات دے انت وچ وفد دے ارکان نوں یادگاری شیلڈز دتیاں گئیاں۔ وفاقی آئینی عدالت نے ایس عزم دا اظہار کیتا کہ اوہ معاشرے دے سارے طبقیاں نال اثر دار رابطے تے بامقصد گل بات نوں ودھاؤن راہیں آئینی شعور، انصاف، برابری تے قانون دی حکمرانی نوں ہور تکڑا کرن لئی اپنی کوششاں جاری رکھے گی۔
