کھڈیاں وچ پسنجر ٹرین دی بحالی خوش آئند اے: ملک سعید، سپیکر محمد احمد

کھڈیاں خاص ریلوے سٹیشن اُتے 16 سال بعد بلھے شاہ پسنجر ٹرین دی بحالی اُتے عوامی جلسہ

وزیر اعلیٰ نے پنڈاں دے لوکاں نوں وی برابر دا انسان سمجھیا اے، سپیکر پنجاب اسمبلی ملک محمد احمد خان

کھڈیاں خاص، قصور (سیاسی نمائندہ)

قصور دے ریلوے سٹیشن کھڈیاں خاص اُتے 16 سال پچھے (بعد) بلھے شاہ پسنجر ٹرین دی بحالی دے موقعے اُتے سپیکر پنجاب اسمبلی ملک محمد احمد خان دی نگرانی وچ اک وڈے عوامی جلسے تے جی آیاں نوں (استقبالیہ) تقریب دا پربندھ کیتا گیا۔ ایس موقعے اُتے ڈی پی او قصور آفتاب پھلروان وی موجود سن۔

رکن پنجاب اسمبلی تے چیئرمین پیمرا ملک سعید احمد خان نے جلسے نال خطاب کردیاں آکھیا کہ جس طرحاں عوام نے صرف اک دن دے سدے (کال) اُتے ایس تقریب نوں کامیاب بنایا اے، اوہ اوہناں دے دلوں شکرگزار نیں۔ اوہناں آکھیا کہ بلھے شاہ پسنجر ٹرین 16 سال بعد دوبارہ بحال ہو رہی اے جیہڑی کہ بڑی خوش آئند گل اے، ایہ ایس علاقے دے لوکاں دا اک پرانا لمیرا (دیرینہ) مطالبہ سی۔

سپیکر پنجاب اسمبلی ملک محمد احمد خان نے اپنے خطاب وچ آکھیا کہ ٹرین دی بحالی نوں ویکھ کے انج لگدا اے جیویں وزیر اعلیٰ نے دیہی علاقیاں (پنڈاں تھانواں) دے لوکاں نوں وی برابر دا انسان سمجھیا اے۔