بلھے شاہ ایکسپریس دا افتتاح، واہگہ شٹل ٹرین وی چھیتی شروع: عباسی
لاہور (اپنے کامرس رپورٹر توں، اے پی پی): وفاقی وزیر ریلوے محمد حنیف عباسی نے آکھیا اے کہ 15 سال بعد بلھے شاہ ایکسپریس دا لاہور توں دوبارہ آغاز کیتا جا رہا اے، لاہور توں واہگہ شٹل ٹرین تے راوی ایکسپریس وی چھیتی شروع کراں گے۔
راوی ایکسپریس نوں ایسے مہینے دی 25 یا 30 تیکر چلون دی کوشش کیتی جا رہی اے، نویاں کوچاں (ڈبے) تے لوکوموٹیوز (انجن) دی شمولیت نال ریلوے دی صلاحیت وچ وڈا وادھا ہوئے گا، 32 دی بجائے 64 نویاں کوچاں شامل کیتیاں جا رہیاں نیں۔ ایہناں خیالاں دا اظہار اوہناں نے لنگھے دن بلھے شاہ ایکسپریس دی افتتاحی تقریب دے موقعے اُتے میڈیا نال گل بات کردیاں کیتا۔ اوہناں نے وزیر مملکت ملک رشید احمد دے ہمراہ لاہور ریلوے سٹیشن اُتے فیتہ کٹ کے بلھے شاہ ٹرین دا افتتاح کیتا۔
حنیف عباسی نے ہور آکھیا کہ بھاویں کوچاں تے پاور پلانٹس دی تنگی دا سامنا اے پر اگست تیکر ہور کوچاں آپریشنل کر دتیاں جان گیاں۔ وزیر اعلیٰ پنجاب مریم نواز نے لاہور ریلوے سٹیشن دی اپ گریڈیشن لئی 2 ارب روپے دتے نیں، لاہور، ملتان، خانیوال تے کراچی ریلوے سٹیشنز اُتے وی کیمرے لاواں گے۔
