حکومت اپنی بنیادی ذمے واری توں ہتھ کھچ چکی اے: حسن مرتضیٰ
نیا نظام لاگو کر کے عام آدمی نوں خودکشی اُتے مجبور کیتا جا رہا اے: پی پی رہنما؛ روزانہ پٹرولیم دیاں قیمتاں دا فیصلہ معاشرتی انتشار دی وجہ بنے گا: بیان
لاہور (سپیشل رپورٹر): پاکستان پیپلز پارٹی وسطی پنجاب دے جنرل سیکرٹری سید حسن مرتضیٰ نے پٹرولیم مصنوعات دیاں قیمتاں دا روزانہ دی بنیاد اُتے فیصلہ کرن دے حکومتی فیصلے نوں شدید تنقید دا نشانہ بناؤندیاں آکھیا اے کہ حکومت اپنی بنیادی ذمے واری توں ہتھ کھچ چکی اے، حکمران نواں نظام لاگو کر کے عام آدمی نوں خودکشی اُتے مجبور کر رہے نیں۔
اپنے بیان وچ پی پی رہنما نے آکھیا کہ روزانہ پٹرول دی قیمتاں دا فیصلہ معاشرتی انتشار دی وجہ بنے گا، ایہدے اثرات صرف پٹرول تے ڈیزل تیکر ای محدود نہیں رہن گے، حکومتی فیصلے نال کھیتی باڑی (زراعت)، صنعت سمیت کئی شعبے متاثر ہون گے۔
حسن مرتضیٰ نے ہور آکھیا کہ حکومتی قدم عام آدمی دا بجٹ تباہ کر کے رکھ دیوے گا، اس عوام دشمن فیصلے نال مہنگائی، بے روزگاری تے بے یقینی وچ وادھا ہووے گا۔
