ایس سی او اجلاس، سرحدی تعاون نوں ہور تکڑا کرن اُتے اتفاق
سرحداں دی صورتحال، سکیورٹی چیلنجاں تے مستقبل دے رجحاناں اُتے وچار وٹاندرا؛ مجاز بارڈر سروسز سربراہاں دے باہمی تعاون نوں ودھاؤن لئی کئی اہم فیصلے
اسلام آباد (وقائع نگار): شنگھائی تعاون تنظیم (ایس سی او) دے ممبر ملکاں دی مجاز بارڈر سروسز دے سربراہاں دا بارہواں اجلاس اسلام آباد وچ ہویا، جس وچ ممبر ملکاں دے اعلیٰ حکام نے سرحدی سلامتی، باہمی تعاون تے ابھردے خطریاں نال نمٹن دے حوالے توں اہم فیصلے کیتے۔
اجلاس وچ بیلاروس، بھارت، ایران، قازقستان، چین، کرغز جمہوریہ، اسلامی جمہوریہ پاکستان، روسی فیڈریشن، تاجکستان، ازبکستان تے ایس سی او دے ریجنل اینٹی ٹیررسٹ اسٹرکچر (RATS) دی ایگزیکٹو کمیٹی دے سربراہاں تے نمائندیاں نے شرکت کیتی۔
اجلاس دے دوران شریک ہون والیاں نے ایس سی او ممبر ملکاں دیاں بین الاقوامی سرحداں اُتے موجودہ صورتحال، سکیورٹی چیلنجاں تے مستقبل دے رجحاناں اُتے تفصیلی وچار وٹاندرا کیتا۔ اس موقعے اُتے سرحدی سلامتی نوں ہور اثر دار بناؤن تے باہمی تعاون نوں ودھاؤن لئی کئی اہم فیصلے وی کیتے گئے۔
اجلاس وچ ممبر ملکاں دی بارڈر سروسز دے سانجھے آپریشن “سولیڈیریٹی 2025” دے نتیجیاں دا جائزہ لے کے اوہناں نوں متفقہ طور اُتے منظور کیتا گیا، جدکہ “سولیڈیریٹی-2026” دے کراؤن تے تیاری دے منصوبے دی وی منظوری دتی گئی۔ شرکاء نے بارڈر سروسز دے ماہرین دے گروپ لئی 2027 دے ورک پلان دی توثیق وی کیتی۔
