اسحاق ڈار دیاں انتونیو گوتریس تے انڈونیشین وزیر نال ملاقاتاں
اسلام آباد (وقائع نگار، اے پی پی) نائب وزیراعظم تے وزیر خارجہ سینیٹر محمد اسحاق ڈار نے شنگھائی وچ ورلڈ آرٹیفیشل انٹیلیجنس کانفرنس دے موقعے اُتے اقوام متحدہ دے سیکرٹری جنرل انتونیو گوتریس نال ملاقات کیتی۔
خطے تے دنیا دی تازہ ترین اہم پیش رفت اُتے گل بات کیتی، سماجی رابطے دے پلیٹ فارم ‘ایکس’ (ٹویٹر) اُتے اک پیغام وچ نائب وزیراعظم نے آکھیا کہ اساں سانجھے عالمی چیلنجاں نال نمٹن، امن نوں ودھان، پائیدار ترقی تے سبھ لئی برابر تے سانجھی ترقی نوں اگے ودھان لئی کثیرالجہتی تعاون دی اہمیت اُتے وی تفصیلی گفتگو کیتی۔ اوہناں نے انڈونیشیا دے وزیر برائے اقتصادی امور ایرلانگا ہرتارتو نال ملاقات وچ دوطرفہ تعلقات نوں ہور مضبوط کرن تے خاص شعبیاں وچ تعاون ودھان اُتے گل بات کیتی۔ اوہناں آکھیا کہ اساں انڈونیشیا دے صدر دے پاکستان دے تاریخی دورے دے دوران طے پانے والیاں مفاہمتوں اُتے عمل درآمد، اہم اقتصادی تے ترقیاتی نتائج دا وی جائزہ لیا۔
ایس دوران نائب وزیراعظم اسحاق ڈار نے چین دے شہر شنگھائی دا اپنا دو روزہ دورہ مکمل کر لیا۔ دورے دے دوران نائب وزیراعظم نے پاکستان ولوں ورلڈ آرٹیفیشل انٹیلی جنس کوآپریشن آرگنائزیشن دے قیام دے معاہدے اُتے دستخط کیتے۔ دستخطاں دی تقریب توں پہلاں نائب وزیراعظم اسحاق ڈار نے چینی صدر شی جن پنگ ولوں کانفرنس وچ شریک وفداں دے اعزاز وچ دتے گئے رات دے کھانے (عشائیے) وچ وی شرکت کیتی۔
