پاکستان تے کویت وچکار وڈے پدھر اُتے دفاعی معاہدے اُتے گل بات
بدلے وچ کویت توں توانائی دے شعبے وچ تعاون تے سرمایہ کاری حاصل کیتی جائے گی
اسلام آباد / ریاض (رائٹرز) پاکستان کویت دے نال اک وڈے پدھر اُتے دفاعی معاہدے لئی مذاکرات کر رہا اے، جس دے بدلے وچ کویت توں توانائی دے شعبے وچ تعاون تے سرمایہ کاری حاصل کیتی جائے گی۔ مذاکرات توں باخبر 5 ذرائع دے مطابق، اے گل بات اجے شروعاتی دور وچ اے تے اک ذریعے دا کہنا اے کہ امریکہ تے ایران وچکار ودھدی ہوئی کشیدگی پاروں اے معاملہ ہور الجھ سکدا اے۔
کویت دا پاکستان دے نال 2023 توں ٹریننگ تے سانجھی مشقاں دا اک محدود دفاعی معاہدہ پہلے توں موجود اے۔ پر، اک پاکستانی سرکاری افسر دے مطابق، ہن کویت اسلام آباد توں سعودی عرب ورگے وڈے معاہدے دی امید رکھ رہا اے، جس وچ “ہزاراں دی گنتی وچ زمینی فوجاں، لڑاکا جہاز، ڈرونز، فضائی دفاعی نظام (ایئر ڈیفنس سسٹم) تے ہور دفاعی سہولتاں” شامل ہون۔
مذاکرات توں واقف اک پاکستانی سکیورٹی افسر نے دسیا: “کویت دی خواہشاں دی لسٹ وچ سبھ کچھ شامل اے۔ پر میں اک گل صاف کر دیاں: اسیں ایس ویلے جنگی دستیاں (کمبیٹ ٹروپس) نوں گھلن اُتے بالکل غور نہیں کر رہے تے نہ ای کر سکدے آں۔”
پاکستانی فوج دے شعبہ تعلقات عامہ (ISPR) تے کویت دی وزارتِ اطلاعات نے ایس لنگھ وچ گل بات کرن دی درخواستاں دا کوئی جواب نہیں دتا۔ پچھلے اک سال دے دوران پاکستان تے خلیجی ملکاں نے نویں علاقائی دفاعی معاہدیاں وچ اپنا فائدہ دیکھیا اے۔ پاکستان کول اک وڈی فوج اے تے اوہ اپنے لڑاکا جہاز خود تیار کردا اے۔
خلیجی ملکاں وچ امریکی تحفظ دے قابلِ بھروسہ ہون بارے ودھدے خدشیاں توں بعد، پاکستان انہاں ملکاں لئی اک دوجے یا وادھو مددگار دے طور اُتے سامنے آیا اے۔ مشرقِ وسطیٰ دے سکیورٹی پلاننگ توں واقف اک ذریعے دا کہنا اے کہ کویت وچ پاکستان نوں اک محفوظ چون (چوائس) سمجھیا جاندا اے۔ اوہناں آکھیا: “اوہ پہلے ای سعودی عرب دے نال شامل نیں، اوہناں دی دفاعی ترقی دی اک لمبی تاریخ اے، اوہ مسلم سنی نیں تے امریکیاں نال وی اوہناں دے چنگے تعلقات نیں، ایس لئی اے آپشن دوجے ملکاں وانگ حساس نہیں اے۔”
ذرائع دے مطابق، ترکی، پاکستان تے سعودی عرب اک وکھرے باہمی دفاعی معاہدے دا مسودہ وی تیار کر رہے نیں۔ ایس توں علاوہ، بحرین وی ایس طرح دے معاہدے وچ دلچسپی رکھدا اے، جدکہ اردن نے ہتھیاراں تے ٹریننگ دے معاہدے دی خواہش ظاہر کیتی اے۔
پاکستان انہاں دفاعی معاہدیاں نوں ملک وچ فوراً چاہیدی سرمایہ کاری لے کے آؤن دا اک ذریعہ سمجھ رہا اے۔ کویت دے نال ممکنہ معاہدے دے حصے دے طور اُتے، اسلام آباد توانائی دی سکیورٹی اُتے تعاون چاہندا اے، جیہڑا کہ پاکستان دی وزارتِ توانائی ولوں تیل تے بالن (ایندھن) دے ذخیریاں نوں ودھان دی وڈی کوشش دا حصہ اے۔
مذاکرات توں باخبر اک پاکستانی ذریعے نے دسیا کہ کویت، پاکستان دے نال مل کے اک ‘بانڈڈ فیول اسٹوریج’ (محفوظ ایندھن دے ذخیرے) بنان اُتے غور کر رہا اے، جیہڑا دونوں ملکاں وچکار پہلے توں موجود ڈیزل دی سپلائی دے سرکاری معاہدے نوں ہور اگے ودھائے گا۔ دو ذرائع دا کہنا اے کہ ایہو جہیاں پیشکشاں پاکستانی قیادت لئی اینیاں کھِچ پاؤن والیاں ہو سکدیاں نیں کہ اوہ اک وڈے دفاعی معاہدے ول ودھن، تے جیویں ای امریکہ-ایران کشیدگی گھٹ ہوئے گی، انہاں مذاکرات دی رفتار تیز ہون دی امید اے۔
