پنجاب: 2325 سزائے موت دے قیدی، 6 ورھیاں توں پھانسیاں معطل
268 دیاں ہائیکورٹ تے سپریم کورٹ توں اپیلاں خارج، 2057 دیاں اپیلاں زیرِ سماعت نیں؛ آخری پھانسی 2019 وچ دتی گئی، حکومت دا انہاں قیدیاں اُتے سالانہ 21 کروڑ توں ودھ خرچ
لاہور (مدثر حسین توں) پنجاب دیاں جیلاں وچ سزائے موت دے 2325 قیدی بند، 268 دیاں ہائیکورٹ تے سپریم کورٹ توں اپیلاں خارج، 2057 دیاں اپیلاں زیرِ سماعت نیں، پنجاب دیاں جیلاں وچ 6 سال توں ہن تک کسی وی سزائے موت دے قیدی نوں پھانسی نہیں دتی گئی، آخری قیدی نوں 6 نومبر 2019 نوں پھانسی دتی گئی سی۔
ذرائع دے مطابق سزائے موت دے قیدی پنجاب دیاں جنہاں جیلاں وچ بند نیں اوہناں وچ سبھ توں ودھ 275 قیدی سینٹرل جیل فیصل آباد وچ، اڈیالہ جیل راولپنڈی وچ سزائے موت دے 186 قیدی، سینٹرل جیل ملتان وچ 173، کوٹ لکھپت جیل لاہور وچ 157، ڈسٹرکٹ جیل شیخوپورہ وچ 143 قیدی تے ہائی سکیورٹی جیل ساہیوال وچ 121 قیدی بند نیں۔ جیلاں وچ بند انہاں قیدیاں وچ کچھ ایہو جہے قیدی وی نیں جیہڑے 2 یا 3 بندیاں نوں قتل کر کے جیل وچ بند نیں۔
جیل حکام دے مطابق پنجاب حکومت اک قیدی اُتے سالانہ اک لاکھ روپے خرچ کردی اے، سزائے موت دے قیدیاں اُتے پنجاب حکومت دے سالانہ 21 کروڑ 13 لاکھ روپے دے اخراجات آ رہے نیں۔
