اسلام آباد وچ سیاحت تے ہوٹل انڈسٹری دے سانجھے منصوبے شروع کرن دا فیصلہ

اسلام آباد: وفاقی وزیر داخلہ محسن نقوی دی صدارت ہیٹھ ہوئے اچیچے (خصوصی) اجلاس وچ فیصلہ کیتا گیا اے کہ سی ڈی اے تے ای او بی آئی اسلام آباد وچ سیاحت، تفریح، ہوٹل انڈسٹری تے ہور شعبیاں نال جڑے کئی سانجھے (مشترکہ) منصوبے شروع کرن گے۔

اجلاس وچ وفاقی وزیر اوورسیز پاکستانیز سالک حسین نے ویڈیو لنک راہیں شرکت کیتی، جڈوں کہ چیئرمین ای او بی آئی جاوید شیخ، چیئرمین سی ڈی اے سہیل اشرف تے دوواں اداریاں دے اعلیٰ افسر وی شریک ہوئے۔

اجلاس وچ سی ڈی اے تے ای او بی آئی نوں ہدایت کیتی گئی کہ اوہ 15 دناں دے اندر سانجھے منصوبیاں دا آخری پلان تیار کرن۔

فیصلے دے مطابق 15 دناں بعد وفاقی وزراء محسن نقوی تے سالک حسین دی صدارت ہیٹھ سانجھا اجلاس ہوئے گا، جس وچ اسلام آباد لئی سیاحت، تفریح، ہوٹل انڈسٹری تے ہور شعبیاں دے تجویز کیتے گئے منصوبیاں نوں آخری شکل دتی جائے گی۔

اجلاس نوں دسیا گیا کہ وزیراعظم دی آخری منظوری توں بعد دوواں اداریاں دے سانجھے منصوبیاں تے باقاعدہ کم شروع کیتا جائے گا۔