ڈارخوین پلانٹ تے حملے وچ کئی پروجیکٹائل ورتے گئے: ایرانی جوہری توانائی تنظیم؛ منصوبہ زیرِ تعمیر، تابکاری دا کوئی خطرہ نہیں: عالمی ایجنسی؛ امریکی جارحیت تے ایران دے کویت تے بحرین تے حملے؛ عبوری معاہدہ اہم نہیں: ٹرمپ؛ جنگ یا امن، اختیار سپریم لیڈر کول اے: عباس عراقچی
تہران، واشنگٹن: (مانیٹرنگ ڈیسک، نیوز ایجنسیاں) امریکہ تے ایران وچکار فوجی کشیدگی خطرناک حد تک ودھ گئی اے تے امریکہ نے ڈارخوین جوہری پلانٹ تے حملہ کیتا اے جس دی ایران نے تصدیق کر دتی اے، جد کہ بین الاقوامی جوہری توانائی ایجنسی (آئی اے ای اے) دا کہنا اے کہ ایٹمی بجلی گھر تے مبینہ حملے دی پڑتال (تحقیقات) جاری اے۔ دوجے پاسے اردن وچ ایرانی میزائل تے ڈرون حملے وچ دو امریکی فوجیاں دی ہلاکت تے اک دے لاپتا ہون توں بعد امریکہ نے ایران دے وکھو وکھ علاقیاں وچ نویں فضائی حملے کیتے نیں، جد کہ ایران نے کویت، بحرین تے خطے وچ موجود امریکی فوجی اڈوں تے مفادات نوں نشانہ بناؤن دے دعوے کیتے نیں۔
تفصیلات دے مطابق آئی اے ای اے نے ایران دے علاقے ڈارخوین وچ زیرِ تعمیر مجوزہ جوہری بجلی گھر دی تعمیراتی تھاں (سائٹ) تے رات ویلے ہون والے امریکی حملے دیاں رپورٹاں دا جائزہ لینا شروع کر دتا اے۔ ایجنسی ولوں ایکس (ٹویٹر) تے جاری بیان وچ آکھیا گیا اے کہ اے تنصیب اجے تعمیر دے مڈھلے (ابتدائی) مراحل وچ اے تے آئی اے ای اے دے آخری معائنے ویلے اتھے کوئی جوہری مواد موجود نہیں سی، ایس لئی تابکاری دے کسے خطرے دا امکان نہیں اے۔ ادارے دے ڈائریکٹر جنرل رافائل ماریانو گروسی نے ساریاں جوہری تنصیبات دے آلے دوالے فوجی کارروائیاں وچ صبر و تحمل دا مظاہرہ کرن دی اپیل نوں دہرایا اے۔
ایران دی جوہری توانائی تنظیم نے ملک دے جنوب مغربی صوبے خوزستان وچ زیرِ تعمیر ڈارخوین جوہری بجلی گھر تے امریکی حملے دی تصدیق کردیاں ہویاں ایس دی سخت مذمت کیتی اے۔ ایرانی خبر رساں ادارے “ارنا” دے مطابق اتوار نوں جاری کیتے گئے بیان وچ ادارے نے آکھیا کہ امریکی انتظامیہ نے مقامی ویلے دے مطابق رات تن بج کے 39 منٹ دے قریب ایس جوہری تنصیب تے حملہ کر کے بین الاقوامی قانون دی خلاف ورزی کیتی۔ بیان وچ ڈارخوین جوہری بجلی گھر نوں ایرانی قوم دے وقار تے سائنسی خود کفالتی دی نشانی قرار دیندیاں ہویاں آکھیا گیا کہ دشمن نے زیرِ تعمیر منصوبے نوں نشانہ بناؤن لئی کئی پروجیکٹائل ورتے نیں۔
امریکہ نے لنگھے (گزشتہ) ایک سال دے دوران بین الاقوامی نگرانی ہیٹھ کم کرن والیاں ایران دیاں پرامن جوہری تنصیبات تے کئی حملے کیتے نیں، جو واشنگٹن ولوں اسرائیلی حکومت نال رل کے شروع کیتی گئی جنگ دا حصہ نیں۔ امریکی سنٹرل کمانڈ (سینٹ کام) دے مطابق صدر ڈونلڈ ٹرمپ دی ہدایت تے کیتے گئے حملیاں دا مقصد آبنائے ہرمز وچ تجارتی جہاز رانی نوں درپیش خطرات گھٹ کرنا تے اردن وچ امریکی فوجیاں تے حملے وچ ملوث پاسدارانِ انقلاب دیاں تنصیبات نوں نشانہ بنانا سی۔ سینٹ کام دا کہنا اے کہ حملیاں دا سلسلہ تیز کردیاں ہویاں لگاتار اٹھویں رات ہون والی کارروائیوں وچ ساحلی نگرانی، فضائی دفاع، میزائل تے ڈرون ذخائر تے بحری فوجی صلاحیتاں نوں نشانہ بنایا گیا۔
امریکی وزیر دفاع پیٹ ہیگستھ نے دو فوجیاں دی ہلاکت تے دکھ دا اظہار کردیاں ہویاں آکھیا کہ اوہناں دی قربانی امریکہ دے عزم نوں ہور تکڑا کرے گی۔ ایران ولوں اردن وچ بیلسٹک میزائل حملیاں وچ امریکی فوج دے 2 اہلکار ہلاک ہو گئے سن جس دی تصدیق سینٹ کام نے وی کیتی اے، ایس اعلان توں بعد جنگ شروع ہون توں ہن تک مرن والے امریکی اہلکاراں دی گنتی 16 ہو گئی اے جد کہ 420 توں ودھ زخمی ہوئے نیں۔ صدر ڈونلڈ ٹرمپ نے صاف آکھیا کہ ایران نوں کسے وی صورت جوہری ہتھیار تیار نہیں کرن دتے جان گے تے ایران دے عبوری معاہدے توں پچھے ہٹن دی اوہناں نوں ذرا وی پرواہ نہیں اے۔
امریکی کیبل نیوز نیٹ ورک “نیوز نیشن” نوں ٹیلی فونک انٹرویو وچ اردن تے ایران دے میزائل حملیاں توں 2 امریکی فوجیاں دی ہلاکت تے خاموشی توڑدیاں ہویاں ٹرمپ نے ایس واقعے نوں ڈاڈھا افسوسناک قرار دتا تے آکھیا کہ اے صورتحال دیکھ کے مینوں بہت دکھ ہویا اے، میں ایران نوں کدی نیوکلیئر ہتھیار حاصل نہیں کرن دیاں گا، جے ایران ڈیل تے عمل نہیں کر رہا تے امریکہ نوں وی کوئی چنتا (فکر) نہیں اے۔
دوجے پاسے ایران دے سپریم لیڈر آیت اللہ مجتبیٰ خامنہ ای نے امریکہ نوں سخت نتائج دی دھمکی دیندیاں ہویاں آکھیا کہ واشنگٹن نوں رولا (تنازع) ودھاؤن دی بھاری قیمت تارنی (چکانی) پئے گی۔ ایرانی حکام دے مطابق امریکی حملیاں وچ خوزستان، ہرمزگان، قشم، سیرک تے زیرِ تعمیر ڈارخوین جوہری بجلی گھر سمیت کئی تھانواں نوں نشانہ بنایا گیا، جد کہ ایرانی وزیر خارجہ عباس عراقچی نے آکھیا کہ دیس دا دفاع آخری ساہ (سانس) تک جاری رکھیا جائے گا، امریکی حملیاں توں شہید ہون والے بندیاں دا لہو رائیگاں نہیں جان دیاں گے تے جنگ یا امن دا آخری فیصلہ صرف سپریم لیڈر دے اختیار وچ اے۔
اوہناں دا کہنا سی کہ اے تاثر غلط اے کہ میں سپریم لیڈر مجتبیٰ خامنہ ای دا نیڑے دا بندہ واں، اوہناں نال کدی ملاقات نہیں ہوئی، صرف کجھ لوکاں نوں ای اوہناں نوں ملن دی اجازت اے۔ ایرانی فوج تے پاسدارانِ انقلاب نے کویت وچ امریکی فوجی اڈوں، علی السالم ایئر بیس، العدیری کیمپ، بحرین وچ امریکی تنصیبات تے عراق دے کجھ اہداف تے ڈرون تے میزائل حملیاں دے دعوے وی کیتے نیں جد کہ ایک امریکی ایم کیو-9 ڈرون مار گرائون دا وی اعلان کیتا اے۔
ادھر کویت تے بحرین نے ایرانی میزائل تے ڈرون حملے ناکام بناؤن دا دعویٰ کردیاں ہویاں آکھیا کہ اوہناں دے فضائی دفاعی نظام نے کئی نشانیاں نوں فضا وچ ای تباہ کر دتا۔ امریکی محکمہ خارجہ نے وی دنیا بھر وچ اپنے شہریاں نوں ممکنہ خطرات توں خبردار کردیاں ہویاں سفری احتیاطی ہدایات جاری کر دتیاں نیں۔ متحدہ عرب امارات نے خطے وچ ودھدی ہوئی کشیدگی تے ڈونگھی (گہری) تشویش دا اظہار کردیاں ہویاں سارے دھڑیاں (فریقوں) تے فوراً جنگ بندی، صبر تے گل بات دا راہ اختیار کرن تے زور دتا اے۔ امریکی تے ایرانی جوابی کارروائیاں پاروں مشرقِ وسطیٰ وچ وڈی جنگ، آبنائے ہرمز وچ جہاز رانی، عالمی توانائی دی سپلائی تے عالمی معیشت تے بھیڑے (سنگین) اثرات پین دے خطرات ہور ودھ گئے نیں۔
