جمعیت علمائے اسلام سنے اپوزیشن جماعتاں دے حکومت مخالف مظاہرے جاری

اسلام آباد: جمعیت علمائے اسلام پلان سی تے عملدرآمد کردیاں دیس دے وکھو وکھ شہراں وچ احتجاجی مظاہرے جاری رکھے ہوئے اے۔

ایہناں مظاہریاں وچ ن لیگ سنے دوجیاں سیاسی جماعتاں دے رہنما تے کارکن شریک سن۔ اسلام آباد وچ نیشنل پریس کلب دے باہر اپوزیشن نے احتجاجی جلسہ کیتا جہدے وچ جے یو آئی، اے این پی تے پختونخوا ملی عوامی پارٹی دے کارکن شریک ہوئے، شرکاء نے حکومت دے خلاف نعرے بازی کیتی۔

متحدہ اپوزیشن دی اپیل تے لہور وچ وی مہنگائی دے خلاف پریس کلب دے باہر احتجاج کیتا گیا۔ مسلم لیگ ن، جے یو آئی تے دوجیاں اپوزیشن جماعتاں دے کارکن پارٹی جھنڈے چکیاں شریک ہوئے۔ شرکاء نے اپنے ہتھاں وچ سبزیاں وی چک رکھیاں سن۔ چمن وچ وی پلان سی تے عمل کردیاں جمعیت علمائے اسلام نے احتجاجی مظاہرہ کیتا جہدے وچ پشتونخوا ملی عوامی پارٹی، اے این پی تے ن لیگی کارکناں نے رلت کیتی، دوجے شہراں وچ وی اپوزیشن جماعتاں نے احتجاج کیتا۔ اپوزیشن جماعتاں دے زیر اہتمام پلان سی دے تحت کوئٹہ دے باچا خان چوک تے وی احتجاجی مظاہرہ کیتا گیا۔

احتجاجی مظاہرے وچ جے یو آئی، پشتونخوا میپ، نیشنل پارٹی تے دوجیاں جماعتاں دے عہدیدار تے کارکن شریک ہوئے۔

اپنا تبصرہ گھلو