دنیا بھر وچ فیس بک سروسز کجھ گھنٹے متاثر رہن توں بعد بحال
لاہور (مانیٹرنگ ڈیسک) دنیا دی سبھ توں مشہور سوشل میڈیا ویب سائٹ فیس بک دیاں سروسز اتوار دی سویر اچانک متاثر ہو گئیاں۔
دنیا بھر وچ لکھاں صارفین نوں لاگ اِن کرن تے پلیٹ فارم ورتن وچ کجھ گھنٹے اوکھائی دا سامنا کرنا پیا۔ فیس بک دے ڈیسک ٹاپ ورژن اُتے صارفین نوں اکاؤنٹ وقتی طور تے دستیاب نہ ہون دا پیغام ملیا۔ پاکستان سمیت وکھو وکھ دیساں وچ فیس بک تے انسٹاگرام ورتن والیاں نے وی خرابیاں دیاں شِکایتاں کیتیاں۔
ویب سائٹس دی بندش اُتے نظر رکھن والے ادارے “ڈاؤن ڈیٹیکٹر” دے مطابق وڈی گنتی وچ صارفین نے ایس خرابی دی رپورٹ کیتی۔ میٹا کمپنی ولوں ہالے تیکر ایس خرابی دی کوئی وجہ نہیں دسی گئی۔
